Sport24.az
"Çox maraqlı mövsüm keçir. Çempionatda intiriqa davam etməkdədir. Nəticə baxımından hər şey istədiyimiz kimi oldu. İlk "3-lüy"ə düşmək uğrunda mübarizə aparırıq". Bu sözləri Sport24.az-a açıqlamasında "Qarabağ-2"in baş məşqçisi Cavad Mirzəbəyli deyib.
Misli Premyer Liqasındada dominantlıq edən, hər il avrokubokların qrup mərhələsinə vəsiqə qazanan"Qarabağ"ın əsas komandasından fərqli, əvəzedicilər öz liqasının ortabalarından hesab olunur. Mirzəbəyli bunun səbəbini belə izah edib:
"Əvəzedicilərin çempionatı sabit deyil. Komandaların fərqli heyəti, strategiyası olur. Biz daha çox gənc futbolçulara güvənirik. Bəzi matçlarda rəqibimiz əsas komandanın 7 oyunçusu ilə meydana çıxıb. Biz isə son illərdə daha çox gənclərə bel bağlayırıq. Buna görə də nəticə önəm daşımır. Futbolçunun yaşı ötürsə, onu ikinci komanda da saxlamağın mənası yoxdur. Ondansa gənc futbolçuları oynatmaq lazımdır. Akademiya və əvəzedici komandamızda potensiallı futbolçularımız çoxdur. Sadəcə, "Qarabağ"ın əsas komandasına düşmək çox çətindir. Premyer Liqada forma geyinən əksər yerli futbolçular belə Qurban Qurbanovun komandasına düşə bilmirlər. Əsas komandaya getmək üçün çox çalışmaq lazımdır. Bu da oyunçuların özündən asılıdır. Hazırda 2-3 futbolçu əsas komandanın məşqçilər korpusunun nəzarətindədir. Ora düşüb-düşməyəcəklərini zaman göstərəcək".
Qeyd edək ki, Əvəzedicilər Liqasında 34 tur geridə qalıb. "Qarabağ-2" 57 xalla 4-cü sırada qərarlaşıb.
