Sport24.az
RƏŞAD QASIMOV
Mahir Emreli 70-ci dəqiqədə meydandan qovulanda oyunu birgə izlədiyim dostlara "artıq bəhanə var. Məğlub olsaq, baş məşqçimiz mətbuat konfransında "qırmızı"nın oyunun gedişinə təsir etdiyini söyləyəcək, növbəti dəfə yenilgiyə "allı-güllü don geyindirəcək" dedim. Millinin isə uduzacağı hiss olunurdu, sadəcə, an məsələsi idi. Artıq 60-cı dəqiqədən etbarən slovaklar qapımıza "oturmuşdular". Rahilin topu hara gəldi uzaqlaşdırması, Bədavinin yorğun sifəti, Mehdinin inamsız baxışları tezliklə qapımızda qol olacağından xəbər verirdi. Hücumdan isə danışmağa dəyməz. Bir vaxtlar ikinci Banişevski olacağını düşündüyümüz Ramilin meydanda nə etmək istədiyini nəinki azarkeşlər, heç özü də başa düşmür. Almaniyada top qovan "gənc və perspektivli" Mahir isə... (açığı, fikirimi ifadə etməyə söz tapmadım. Mən də bu yerdə millimiz kimi aciz və əlacsızam).
Fernandu Santuşa gəlincə, "portuqaliyalının gəlişi ilə yığmada müsbət yöndə nə dəyişib" sualına cavab tapana şəxsən özüm hədiyyə verəcəm. Millinin nə oyun dəst-xətti var, nə də sabitliyi... Yox, burda səhvə yol verdim. "Sabitlik" var, 4 oyun, 4 məğlubiyyət...
75-ci dəqiqədə qonaqlar ikinci qolu Dağıstan futbol məktəbinin yetirməsi Mehdi Cənnətovun qapısından keçirincə, futbolçularımız sanki Aşıq Ələsgərin "Sındı" qoşmasındakı son misraları xatlırladılar: "sındı qol qanadım, yanıma düşdü"... Estoniya ilə oyunda olduğu kimi, bu dəfə də hesabda geri düşən komandanın oyunçularının gözü tabloda idi. Həmin an onların ən böyük arzusu 90 dəqiqənin tez başa çatması idi. Faciə də bundadı ki, artıq yığma üzvləri geridönüş edəcəklərinə, gedişatı dəyişə biləcəklərinə inanmırlar. Santuşun yığmasının bir adı var: ruhsuz və inamsız milli.
Halbuki, bir neçə ay öncə, daha dəqiq desək, iyunda Macarıstan toplanışı çərçivəsində Qazaxıstanla üz-üzə gələn komanda hesabda 0:2 geri düşsə də, ikinci yarıda geridönüş edərək 90 dəqiqəni qalib başa vurmağı bacarmışdı. Arif Əsədovu bəyənməyənlər, görəsən, indi nə fikirləşirlər, "Haladaş" İdman Kompleksində baş tutan matçı xatırlayırlar?
Portuqaliyalının fikrincə, oyunun sınma anı Emrelinin meydandan qovulması oldu. Bəlkə də düz fikirləşir, ancaq yenə də səhv özündən qaynaqlanır. Niyə? Səbəbini deyim, siz də bilin. Santuşun yanında azərbaycanlı mütəxəssis, ölkə futbolunu və futbolçularını yaxından tanıyan biri olsaydı, deyərdi ki, Mahirin passivində "sarı" var, onu dəyişmək lazımdı. Axı, Mahirin qırmızə almaq ehyimalı standartdan xeyli yüksəkdi. Biz bunun dəfələrlə dəfələrlə şahidi olmuşuq. UEFA Millətlər Liqasının 2020/2021 mövsümünü xatırlayın. Lüksemburqla görüşün 25-ci dəqiqəsində rəqibə qarşı kobud oynayan forvard "qırmızı" ilə "mükafatlandırlmışdı". Təəssüf ki, cənab Santuş azərbaycanlılara güvənmir, bizlərə inanmır.
Qarşıdakı oyunlarda bizi nə gözləyir? Növbəti turlarda nə olacağını deyə bilmərəm, yalnız onu bilirəm ki, Azərbaycan futbolunda növbəti qara tarix yazılır və bu tarixin "qəhrəmanlar"ı hələ çox xatırlanacaq...
