Sport24.az
"Araz-Naxçıvan"ın futbolçusu Qara Qarayev Bakıda Kipr təmsilçisi "Omoniya"ya 0:4 hesabı ilə uduzduqları UEFA Konfrans Liqasının III təsnifat mərhələsinin ilk oyunundan sonra jurnalistlərin suallarını cavablandırıb.
Sport24.az-ın məlumatına görə, təcrübəli yarımmüdafiəçi ilk olaraq matç haqqında fikirlərini bölüşüb:
- Oyunun çətin olacağını bilirdik. Yaxşı komandaya qarşı mübarizə aparırdıq. Amma nələrisə dəyişmək istəyirdik. Amma təəssüf ki, edə bilmədik. Düşünürəm ki, son illərdə Azərbaycan təmsilçilərinə düşən ən yaxşı klublardan birinə qarşı oynadıq.
- Daha əvvəl "Omoniya"ya qarşı oynamısınız. Hər iki kollektiv arasındakı fərqləri deyə bilərsinizmi?
- Mətbuat konfransında da bu haqda danışmışdım. Məncə, çox fərq var. Bunu görürəm. Öz fəlsəfələri, oyunçularının keyfiyyəti çox dəyişib. Düşünürəm ki, "Omoniya" əvvəlki illərlə müqayisədə daha təhlükəli və çox qol vura bilən komandadır.
- Bəziləri fikirləşir ki, komanda görüşün əvvəlində qorxaq oynadı. Sizcə necədir?
- Bilmirəm. İstər-istəməz bizim kimi komandalar bu cür matçlara daha ehtiyatlı başlamaq istəyir. Çünki "Araz-Naxçıvan"da rəqib qədər beynəlxalq təcrübə yoxdur. Yeni başlamışıq. Ona görə də qorxaq yox, ehtiyatlı başladıq.
- Səncə, səfərdəki oyunda geridönüş etmək ehtimalınız var?
- Bunun üçün şans hər zaman var. Futbolda hər şey mümkündür. Çətin olacağını da bilirik. Məğlub olmuşuq, amma mübarizə bitməyib. Çalışacağıq ki, səfərdə özümüzə layiqli şəkildə mübarizə aparaq. Amma nəticə barədə hər hansı fikir deyə bilmərəm.
- "Araz-Naxçıvan"ın bugünkü oyunu sizi qane etdimi?
- Bizim komandada keyfiyyətli oyunçular çoxdur. Sadəcə, bizə müəyyən vaxt lazımdır. Buna baxmayaraq ilk turda "Aris"i mübarizədən kənarlaşdıra bildik. Daha yaxşı kollektiv qurmaq üçün vaxta ehtiyacımız var. Çox da pis deyilik. Uğur qazanmaq istəyiriksə, hamı əlindən gələnin ən yaxşısını etməyə çalışmalıdır.
- Komandanın ən təcrübəli futbolçususan. Səncə, kollektiviniz psixoloji və fiziki yorğunluğu üzərindən ata biləcək?
- Biz o gücə malikik. Bu təzyiqi ata bilərik. Amma bir şeyi də unutmaq lazım deyil. Yunanıstan səfərində son 45 dəqiqəni 10 nəfərlə oynamışdıq. Bu da yorğunluq deməkdir. Məncə, psixoloji cəhətdən daha yaxşı ola bilərik və dəyişmək üçün gücümüz var.
- Səncə, bu gün İqor Ribeyronun yoxluğu hiss olundu?
- O, komandamızın əsas müdafiəçilərindən biridir. Digərləri ilə müqayisə etmək istəmirəm. Amma onun haqqında xoş sözlər deyə bilərəm. Çempionatımızın ən yaxşı müdafiəçilərindən biridir. Onun olmaması komanda üçün itkidir.
- Belə hesabla məğlubiyyəti beynəlxalq arenadakı təcrübəsizliklə əlaqələndirmək olarmı?
- Təcrübəsizlik, yorğunluq və yaxud ani diqqətsizlik. Çox detallar sadalamaq olar. Hər halda bu gün uduzmuşuqsa, üzərində dayanıb səbəblər axtarmağa gərək yoxdur. Bu, sensasiyalı nəticə deyil. Futbolda ola bilən nəticədir. Bu gün də biz yaşadıq. Düşünürəm ki, "Araz-Naxçıvan" olaraq daxili və beynəlxalq arenada qələbələrimiz olacaq.
- 4:0 hesablı məğlubiyyətdən sonra geridönüş etmək çətindir. Kiprdən qayıdandan sonra "Zirə" ilə üz-üzə gələcəksiniz. Hansı matça daha çox köklənməyi düşünürsünüz?
- Məncə, peşəkarıqsa, hər cəbhəyə eyni diqqət ayırmalıyıq. Birini axsatsaq, hər iki tərəfdə problemimiz ola bilər. Əsas məsələ bugünkü matçı unutmaqdır. Cavab qarşılaşmasına hazırlaşmalıyıq. Məğlubiyyətlə qala bilmərik. Belə edəcəyiksə, başqa peşə seçməliyik. Dərhal unudub növbəti qarşılaşmalara hazırlaşmalıyıq.
- Azarkeşlərə müraciətiniz varmı?
- Ruhdan düşməsinlər. Bu komanda yeni qurulub. Biz də istəkliyik, azarkeşləri sevindirmək niyyətindəyik. Düşünürəm ki, biz klublarımızı qələbələrinə görə sevməməliyik. Belə olsa, daha çox azarkeş kütləsi görəcəyik. Ruhdan düşməsinlər. Futbol davam edir. Növbəti qələbələrimizlə onları sevindirəcəyik.
