Idman.biz
"Araz-Naxçıvan"dan ayrılan Qara Qarayev seçim ərəfəsindədir. Təcrübəli yarımmüdafiəçi gələcəyi ilə bağlı qərar verməyə çalışır.
İdman.Biz futbolinfo.az-a istinadən xəbər verir ki, uzun illər "Qarabağ"ın şərəfini qoruduqdan sonra "Neftçi"yə keçən, lakin burada istədiyi kimi oynamağı bacarmayan Qara Qarayev, Naxçıvan təmsilçisində də ümidi doğrultmadı. Ehtiyatda çox qalması onun vidasına səbəb oldu.
Karyerasının qürubda olduğunu anlayan yarımmüdafiəçi yeni klub axtarır. "Sumqayıt"ın favorit olduğu siyahıda digər bir neçə klub da var ki, Q.Qarayevə müqavilə təklif edib. O isə hələlik düşünməkdədir.
33 yaşlı Qara Qarayev uzun illər oynaya bilməyəcəyinin fərqindədir. Bu səbəbdən o, tezliklə məşqçi kurslarına da qatılmağı hədəfləyir. Q.Qarayev oynamaqla yanaşı məşqçiliyin sirrlərini də öyrənəcək. Bu isə onun futbolda qalacağı deməkdir.
