Sport24.az
Ötən gecə Afrika Millətlər Kubokunun həlledici oyunu keçirilib. Sport24.az xəbər verir turnirin son matçında Seneqal millisi meydan sahibləri Mərakeşlə qarşılaşıb.
Moulay Abdullah İdman Kompleksində keçirilən görüşdə Seneqal millisi qalib gəlib – 1:0.
Oyunun taleyi əlavə vaxtda müəyyənləşib. 94-cü dəqiqədə Pap Qeye Seneqal millisinə qələbə gətirən qolu vurub.
Final oyunu qalmaqalsız ötüşməyib. Seneqal millisinin baş məşqçisi Pap Tiyav qarşılaşmanın 90+8-ci dəqiqəsində qapılarına təyin olunan penaltiyə etiraz edərək komandanı meydandan çıxarıb. Buna qədər matçın 90+2-ci dəqiqəsində seneqallıların vurduğu qol da qeydə alınmayıb. Referi Əşrəf Hakimiyə qarşı qayda pozuntusu olduğunu əsas gətirərək Abdullay Sekin hərəkətini qayda pozuntusu kimi qiymətləndirib. Hakimin hücumun sonunu gözləmədən fit çalması VAR-ın müdaxilə imkanını aradan qaldırıb və epizod yoxlanılmayıb. Bu qərar böyük narazılığa səbəb olub. Seneqalın qapısına penalti təyin olunan zaman isə baş məşqçinin göstərişi ilə futbolçular meydanı tərk ediblər.
Bu zaman Seneqalın lideri Sadio Mane yaşananlara müdaxilə edərək oyunun davam etməsinə nail olub. O, paltardəyişmə otağına yollanaraq komanda yoldaşlarını meydana qaytara bilib.
Mərakeş millisinin üzvü Brahim Dias isə 90+24-cü dəqiqədə penaltini dəqiq yerinə yetirə bilməyib. Seneqalın qapıçısı Eduar Mendi zərbəni dəf edərək hesabın dəyişməsinə imkan verməyib.
Qeyd edək ki, bu Seneqal millisinin Afrika Millətlər Kubokunda ikinci zəfəridir. Komanda 2021-ci ildə də kuboku baş üzərinə qaldırıb. Mərakeş isə 1976-cı ildə Afrika Millətlər Kubokunun qalibi olub.
Ötən gün bürünc medal uğrunda görüşdə isə Nigeriya penaltilər seriyasında (4:2) Misirə qalib gəlib.
