Lent.az
Braziliyada sevgilisini öldürən və buna görə uzunmüddətli həbs cəzası alan tanınmış qapıçı siyasətə qoşulmaq niyyətində olduğunu açıqlayıb.
Lent.az xarici mediaya istinadla bildirir ki, 2013-cü il martın 8-də məşhur "Flamengo" klubunun sabiq kapitanı Bruno Fernandes de Souza 22 il müddətinə azadlıqdan məhrum edilib. İstintaq müəyyən edib ki, o, sevgilisi və övladının anası olan Eliza Samudionu qətlə yetirib. Qadının cəsədi tapılmayıb. İstintaq versiyasına görə, qalıqların bir hissəsi itlərə verilib, digər hissəsi isə betonla örtülüb. Futbolçu özünü təqsirli bilmədiyini desə də, onun əmisi oğlu cinayətdə iştirak etdiyini etiraf edib.
2017-ci ildə Fernandes amnistiya əsasında azadlığa buraxılıb və aşağı divizion klublarında karyerasını davam etdirib. Bu yaxınlarda 41 yaşlı futbolçu onun komandası "Vasco da Gama"nın Braziliya Kubokunda iştirak edəcəyini bildirib.
Bundan əlavə, Fernandes karyerasını başa vurduqdan və 2031-ci ildə şərti cəza müddəti bitdikdən sonra siyasətlə məşğul olmağı planlaşdırdığını açıqlayıb.
