Idman.biz
PSJ Aşraf Hakiminin "Qızıl top"la bağlı sözlərini müsahibədən çıxarmaq istəyib.
İdman.biz xəbər verir ki, Paris klubunun və Mərakeş yığmasının sağ cinah müdafiəçisi Canal+ telekanalına verdiyi müsahibədə nüfuzlu mükafata layiq olduğunu bildirib.
Hakimi tarixi mövsüm keçirdiyini deyib: "Çempionlar Liqasının 1/4 final, yarımfinal və final mərhələlərində qol vuran çox az oyunçu olub. Müdafiəçi üçün bunu etmək daha da çətindir".
"L"Équipe" nəşrinin məlumatına görə, PSJ mövsümün ən yaxşı futbolçusu mükafatına namizəd kimi Usman Dembeleni dəstəkləyir. Lakin klub eyni zamanda digər futbolçuların, o cümlədən Hakiminin də namizədliyinə müsbət yanaşaraq heç kimi incitmək istəmir.
Bununla belə, Hakiminin müsahibəsindəki "Qızıl top"la bağlı hissənin qalmaqal yarada biləcəyini anlayan klub həmin hissəni silməyə çalışıb. Lakin futbolçu buna razı olmayıb, çünki bu mükafatı istədiyini deməyə haqqı olduğunu düşünür.
Mənbənin qeyd etdiyinə görə, bu vəziyyətə münasibət bildirən PSJ klubu "tam sakit" olduğunu və "Avropa Superkuboku uğrunda "Tottenhem"lə oyuna hazırlaşmağa tam fokuslandığını" bildirib. Qarşılaşma avqustun 13-də baş tutacaq.
Eyni zamanda, PSJ müsahibəyə müdaxilə cəhdlərini inkar edir, lakin "L"Équipe" öz mövqeyində israrlıdır.
"Qızıl top"un sahibi sentyabrın 22-də keçiriləcək mükafatlandırma mərasimində açıqlanacaq.
İdman.biz
