Idman.biz
Bu həftə Misli Premyer Liqasının daha iki iştirakçısının adı bəlli ola bilər.
İdman.biz xəbər verir ki, Azərbaycan çempionatının elitasına iki vəsiqə I Liqanın XXII turunda sahibini tapmağa yaxındır.
"İmişli" və "Karvan" artıq Premyer Liqanın qapısını döyür. İlk "üçlük"də qərarlaşan bölgə təmsilçiləri I Liqanın lideri "Qəbələ"nin ardından yüksək dəstə vəzifəsini qarşıdakı görüşdə həll edə bilər.
Hazırda İmişlinin eyniadlı klubu 41 xalla ikinci, bir xal geri qalan Yevlax təmsilçisi üçüncü sırada yer alıb. 4-cü pillədəki "Zaqatala"nın isə cəmi 28 xalı var. Üstəlik, sonuncular qələbə sayında da çox geridədir. Finişə isə cəmi 5 tur qalıb.
Qarşıdakı tura aprelin 24-də start veriləcək. "İmişli" və "Karvan" isə ertəsi gün meydana çıxacaqlar.
Premyer Liqaya vəsiqələrdən birinin taleyi Zaqatalada həll oluna bilər. Şəhərin eyniadlı komandası evdə "İmişli"ni qəbul edəcək. Qonaqlar bu oyunda uduzmasa, Premyer Liqaya yüksələcək.
"İmişli" gözlənilən vəsiqəni səfərdə əldə etməyə yaxındırsa, "Karvan" doğma azarkeşlərinə bayram yaşatmaq imkanına malikdir. Yevlaxda "Cəbrayıl"ı qəbul edəcək komandaya bunun üçün qələbə lazımdır. "Karvan" turu 3 xalla başa vursa, 2025/26 mövsümündə Premyer Liqada oynayacaq.
Yevlaxlılara 1 xal da yetərli ola bilər. Amma bunun üçün gərək həm "Zaqatala", həm də MOİK-lə "Baku Spotrinq" xal itirməlidir. Zaqatala təmsilçisi uduzsa, Bakı klubları qələbə qazanmasa, "Karvan" məğlubiyyətlə də elitaya yüksələcək.
Qeyd edək ki, qarşıdakı turda MOİK "Qəbələ"nin, "Baku Sportinq" isə "Mingəçevir"in qonağı olacaq.
Vüqar Xeyrullayev
İdman.biz
