İdman.biz
"Turan Tovuz"a qarşı matç çox çətin keçdi. Belə olacağı gözlənilən idi. Çünki turnir cədvəlində qonşu pillələrdə qərarlaşmışıq. Bu görüşdə əsas olan nəticə idi. Biz də onu qazandıq, qalib gəldik".
İdman.biz xəbər verir ki, bunu Sportal.az saytına açıqlamasında "Araz-Naxçıvan"ın futbolçusu Felipe Santos deyib.
Braziliyalı vinger komandasının yüksək pillələrdə qərarlaşmasını şərh edib: "Vacib olan qələbədir. Bir çox komanda yaxşı oynayır, amma uduzur. Bəzən isə biz pis oynayırıq, ancaq qələbə qazanırıq. Bəziləri deyir ki, komandamız keyfiyyətli oynamır. Amma biz 14 matçdır uduzmuruq. Başa düşmürəm, keyfiyyət yoxdursa, bu nəticələri necə qazanırıq?".
Felipe Santos bu gün ölkə kubokunun 1/8 final mərhələsi çərçivəsində "Mingəçevir"lə qarşılaşacaq komandasının şanslarını da dəyərləndirib: "Düzünü desəm, Birinci liqa haqqında çox da məlumatlı deyiləm. Sadəcə sabiq komandam olan "Qəbələ"ni izləyirəm. Biz yalnız özümüzü düşünürük. Bu gün qələbə qazanmalıyıq və bu ən vacib məsələdir".
Qeyd edək ki, Felipe Santos hazırda 8 qolla Misli Premyer Liqasının bombardiridir.
İdman.biz
