Sport24.az
Ötən gün "Qusar"ın vitse-prezidenti Kamran Əlibabayev Sport24.az-a açıqlamasında "Şahdağ Qusar"la matça çıxmamaqlarının səbəbini söyləmişdi. Funksioner əksər futbolçularının Minifutbol Liqasında mübarizə aparan "Birbaşa Bakı"nın heyətində çempionat oyununa çıxdığından Qusar derbisində iştirak edə bilmədiklərini vurğulamaqla yanaşı, PFL-in oyunu təxirə salmadığını da bildirmişdi.
Məsələ ilə bağlı PFL mövqeyini açıqlayıb:
"Əlbəttə ki, bütün liqalarda oyunların davamlı şəkildə və tam say tərkibində keçirilməsi bizim üçün vacib məsələlərdən biridir. Bununla yanaşı, biz yarışların hansısa müraciətlər və ya istəklər əsasında deyil, yarışın mövsümdən öncə təsdiqlənmiş Əsasnaməsi əsasında keçiririk
"Qusar" Klubu ilə Peşəkar Futbol Liqası arasında münasibətlər digər klublarla olduğu kimidir. Müvafiq çatışmazlıqlar və çox sayda təkrarlanan gecikmə, sənədlərin vaxtında təqdim olunmaması və bu kimi digər neqativ hallara baxmayaraq, biz hər zaman dəstəyimizi nümayiş etdirmişik. Onlarla olan son danışıqlarımızın isə xronoloji ardıcıllığı belədir:
II Liqa 13-cü turun açıqlanma vaxtı – 10 dekabr (qrupa atılıb, imeyl yazılıb və sayta yerləşdirilib)
PFL-in rəsmi imeyl ünvanına "Qusar" FK-nın rəsmi müraciəti – 13 dekabr (cümə günü, gecə 22:11, yəni qeyri-iş günü və saatı)
PFL-in cavabı - 16 Dekabr (II Liqa Əsasnaməsinin 3-cü maddəsinin 11-ci bəndində qeyd olunduğu kimi, açıqlanmış təqvimin dəyişdirilməsi ilə bağlı müraciətlərə baxılmır. PFL cavab rəsmi cavab göndərib).
PFL-in rəsmi imeyl ünvanına "Qusar" FK-nın 2-ci müraciəti - 17 dekabr (məktubu təsdiq edən imza və möhür olmayıb). PFL-in cavabı, eyni gündə və eyni tərkibdə).
Yekunda bildirmək istəyirik ki, II Liqa Əsasnaməsinin 3-cü maddəsinin 11-ci bəndində qeyd olunduğu kimi, açıqlanmış təqvim oyununun təxirə salınması ilə bağlı müraciətlərə baxılmır. Futbolçuların II Liqa yarışında deyil, bu və digər liqada oyuna çıxmasına məhz kütləvilik və digər məqamlar nəzərə alınaraq PFL tərəfindən icazə verilib, amma bütün bunlar PFL-in təqviminə bu və ya digər müdaxilə ilə nəticələnə bilməz. Məlumat üçün bildirək ki, təqvim açıqlanmamış klubların bu və digər müraciətləri PFL tərəfindən incələnib və mümkün dəstək göstərilib".
