Peşəkar Futbol Liqasının peşəkar fəaliyyəti

Peşəkar Futbol Liqası (PFL) Azərbaycan Premyer Liqasını, kubok yarışı, 1 və 2-ci liqaları, əvəzedicilərin çempionatını keçirən qurumdur. Yəni bu təşkilat hazırda düz 5 turnirin keçirilməsinə məsul qurumdur. 

Adətən, qurumun bu yarışlarda təşkilatçılığı istər media, istərsə də klublarda müsbət qiymət alıb. Amma o da qeyd olunmalıdır ki, PFL-in uzun illərdir ki, yüksək təşkilatçılığı həm də diqqəti çox cəlb etmir. Səbəbsiz də deyil. Çünki qurum bir növ təvazökar mövqe tutaraq kölgədə qalmağı üstün tutub. Azarkeşlərin çoxu isə bundan xəbərsiz olur. Ona görə ki, əksər halda gözlər oyuna, komandalara, futbolçuların performansında, bir sözlə, meydanda baş verənlərə yönəlir. Ancaq bu oyunların təşkili – qarşılaşmalardan əvvəlki hazırlıq, təhlükəsizlik, media üçün şərait, azarkeşlərin istəyinin nəzərə alınması, digər gözlənilən və gözlənilməyən problemləri həllinə dərhal müdaxilə etmək işi də var ki, xeyli müddətdir PFL bunu məhdud şərait və kollektivlə yaxşı bacarır, ortaya keyfiyyətli iş qoyur.  

Elxan Səmədov

Buna ən son bir neçə gün əvvəl Azərbaycan 2-ci Liqasında "Şəfa" və "Şahdağ Qusar" komandaları arasında keçirilən vacib oyunda da bunun şahidi olduq. Bizdə 2-ci liqa üçün qeyri-ənənəvi hesabə edilən sayda (4500 nəfər) azarkeşin izlədiyi qarşılaşmada qol olmasa da, həm azarkeşlər, həm komandalar, həm də media nümayəndələri üçün bu görüş müsbət məqamlarla yadda qaldı. PFL kollektivi bu dəfə də təşkilati baxımdan özünü göstərdi, görüş hər baxımdan yüksək standartlara uyğun keçirildi. Təbii ki, görülən işlər bu qurumun vəzifə borcu olmaqla yanaşı, aşağı liqanın matçına yüksək peşəkarlıqla yanaşmaq həm də alqışalanmalıdır.

Beş müxtəlif turniri peşəkarlıqla keçirmək asan iş deyil. Onu da qeyd edim ki, bu liqaların keçirilməsi üçün PFL-in mövcud büdcəsi də çox azdır. Təbii ki, nöqsanlar da var və bunlar qaçılmazdır. Ancaq görürük ki, nümunəvi işlər xırda nöqsanları ört-basdır edə bilir. Çünki ortada işə həvəs və sevgi var. Bu sevgi futbol sahəsində çalışan bütün insanlarımızda olsa, indi çox fərqli bir mənzərənin şahidi olardıq.  

Onsuz da qurumun adı "Peşəkar"la başlayır deyə bilərsiniz. Amma bizdə o qədər peşəkar adı ilə həvəskar formada iş görənlər var ki...

Ramiq Ağaməmmədov