Peritan Bozdağ: "Fənərbaxça"ya keçid qərarım uzun çəkmədi" - MÜSAHİBƏ

Türkiyənin "Fənərbaxça" komandasına keçən qadın futbolçulardan ibarət Azərbaycan millisinin üzvü Peritan Bozdağın AZƏRTAC-a müsahibəsi

- "Fənərbaxça"ya keçidiniz barədə nə deyə bilərsiniz?

- Özümü çox xoşbəxt hiss edirəm.Bu cür kluba keçmək qürurvericidir.

- İstanbul təmsilçisindən təklifi nə vaxt aldınız?

- Milli komanda ilə keçirilən son təlim-məşq toplanışında bu məsələ gündəmə gəldi. Artıq danışıqlarımız var idi. Qərar verməyim isə çox uzun çəkmədi.

- Türkiyənin ən böyük klublarından birinə keçmək sizin üçün nə ifadə edir?

- Türkiyənin ən böyük idman klubuna keçmək mənim üçün çox gözəl hadisədir. Psixoloji cəhətdən yanaşsaq, "Fənərbaxça" hər zaman liderlik üçün mübarizə aparan, qalibiyyətə oynayan komandadır. Bu vəziyyət mənə də müsbət şəkildə təsir edə bilər. Düşünürəm ki, klubla eyni hissləri yaşayıram və əminəm ki, bu birlik mənə çox kömək olacaq, eləcə də gələcək həyatıma yaxşı mənada təsir göstərəcək.

- Klubun yeni mövsümdəki hədəfləri nələr olacaq?

- "Fənərbaxça" çempionluq üçün oynayan klubdur. İnşallah, mən də bu yolda öz töhfəmi verəcəyəm. Komandanın məqsədlərinə çatması üçün əlimizdən gələni edəcəyik.

- Azərbaycan və Türkiyənin qadın futbolu arasında fərqlər nələrdir?

- Azərbaycan millisinin futbolçuları Türkiyə klublarında çıxış edirlər. Sadəcə, xalqdan və federasiyadan çoxlu dəstək gözləyirik. Daha çox qızın bizim kimi böyük klublarda oynaya bilməsi üçün bu dəstək vacibdir. Onu da demək istəyirəm ki, yetəri qədər dəstək olduqdan sonra qadınlar hər şeyi bacarar.

- Azərbaycanlı azarkeşlərə nə demək istərdiniz?

- Oradakı azarkeşlərə demək istəyirəm ki, kişi futboluna olduğu kimi, qadın futboluna da eyni dərəcədə dəstək göstərilsə, nəticələr daha uğurlu və təsirli olar. Azərbaycandakı bütün qızlara səslənirəm – əgər zəhmət çəkirsinizsə, intizamlısınızsa və çalışırsınızsa, xəyallarınızı reallaşdıra bilərsiniz. Heç vaxt ümidinizi itirməyin.

İdman.biz