Sport24.az
"Gərgin 120 dəqiqədən sonra oyunun taleyinin penaltilər seriyasında həll olunması məni çox həyəcanlandırdı. Fuad topa yaxınlaşan zaman həyəcanım daha da yüksəldi, ürək döyüntülərim artdı. Həmin an keçirdiyim hissləri sözlə ifadə edə bilmirəm". Bu sözləri Sport24.az-a açıqlamasında Etibar Bayramov deyib.
Penaltilər seriyasında şansını boşa verən Fuad Bayramovun atası fürsətdən istifadə edib "Zirə" azarkeşlərinə də müraciət edib: "Çox heyif ki, Fuadın zərbəsi tirdən qayıtdı. Buna çox məyus oldum. Hələ də şokdayam. Amma oğlumla söhbət edəcəm. Hazırda ona dəstək olmalıyam. Fuad bu yerə gəlib çıxmaq üçün çox əziyyət çəkib. İstərdim ki, "Zirə"sevərlər və futbol ictimaiyyəti ona mənəvi dəstək olsun".
Qeyd edək ki, dünən baş tutan "Zirə" – Şerif" matçının taleyinə penalti vuruşlarında aydınlıq gəlib. "Qartallar"ın heyətində məhz Fuad Bayramov qeyri-dəqiq olub. Onun zərbəsi tirə tuş gəlib.
