Idman.biz
"Qarabağ"ın braziliyalı yarımmüdafiəçisi Pedro Bikalyonun Futbolinfo.az saytına müsahibəsi
– "Qarabağ"ın bu yay heyətinə qatdığı yeni transferlərdən birisiniz. Adaptasiya prosesiniz necə keçir? Kollektivə və komandanın oyun üslubuna tam uyğunlaşmağınız üçün sizə nə qədər vaxt lazım olacaq?
– Adaptasiya prosesi çox pozitiv keçir. Həm futbolçular, həm də məşqçilər – ümumilikdə klub məni çox yaxşı qarşıladı. Təbii ki, hər adaptasiya müddət tələb edir, xüsusilə də komandanın bütün taktiki detallarını başa düşmək üçün. Amma inanıram ki, doğru yoldayam. Məşqdən-məşqə, oyundan-oyuna özümü daha rahat hiss edirəm. Düşünürəm ki, çox qısa zamanda tam uyğunlaşacağam.
– Avstriya toplanışında keçirdiyiniz 4 yoxlama oyunundan 3-də məğlub oldunuz. Düzdür, yoxlama matçlarında nəticə önəm daşımır. İstənilən halda, bu nəticələr sizdə narahatlıq yaradırmı?
– Xeyr, bu məni narahat etmir. Bilirik ki, yoxlama oyunları əsasən taktiki quruluşları yoxlamaq, oyunçuların bir-birinə uyğunlaşmasını artırmaq və oyun ritmini bərpa etmək üçündür. Əlbəttə, qalib gəlmək istərdik, amma əsas məqsəd rəsmi oyunlara tam hazır olmaqdır. Biz də bu istiqamətdə çalışırıq və inkişaf edəcəyimizə əminik.
– "Qarabağ" Çempionlar Liqasında mübarizəyə 2-ci təsnifat mərhələsindən start verəcək. Növbəti mərhələyə adlamaq şansınızı necə dəyərləndirirsiniz?
– Mən komandamıza çox inanıram. Bilirik ki, Çempionlar Liqasının oyunları rəqibdən asılı olmayaraq, hər zaman çətindir. Amma "Qarabağ" bu turnirdə təcrübəsi və ənənəsi olan bir klubdur. Fəaliyyət və konsentrasiya ilə biz növbəti mərhələyə keçmək üçün bütün şanslara malikik.
– Ötən mövsüm Avropa Liqasının Liqa mərhələsinə qədər irəliləmiş və həmin mərhələdə sonuncu olmuş "Qarabağ" bu mövsüm avrokuboklarda daha yaxşı nəticəyə imza ata biləcək?
– Bəli, buna inanıram. Klub hər beynəlxalq təcrübədən dərs çıxarır. Bu mövsüm heyət daha güclüdür və komanda daha da yetkinləşib. Bu da bizə daha stabil və rəqabətədavamlı çıxış etməyə imkan verəcək. Məqsədimiz həm "Qarabağ"ı, həm də Azərbaycan futbolunu Avropada layiqincə təmsil etməkdir.
– Baş məşqçi Qurban Qurbanov haqda ilkin təəssüratınız necədir? O, buvaxtadək çalışdığınız məşqçilərdən nə ilə fərqlənir?
– Çox ağıllı məşqçidir, klubu yaxşı tanıyır və aydın taktiki baxışa malikdir. İntizamı, yüksək tempdə oyunu və təşkilatçılığı sevir. Məni ən çox təəccübləndirən odur ki, həm fərdi, həm də kollektiv şəkildə oyunçulardan maksimumu ala bilir. Çox hörmət edilən bir liderdir və mən ondan çox şey öyrənirəm.
– "Qarabağ"da buvaxtadək xeyli sayda braziliyalı futbolçu çıxış edib və etməkdədir. Sizcə, Qurban Qurbanovun "sambaçılar"a üstünlük verməsinin səbəbi nədir?
– Düşünürəm ki, bu, braziliyalı oyunçuların tez uyğunlaşması, texniki baxımdan keyfiyyətli olması və rəqabətçi ruhu ilə bağlıdır. Baş məşqçi bu xüsusiyyətləri oyun fəlsəfəsinə uyğun şəkildə istifadə etməyi bacarır. Eyni zamanda, klubun mühiti bu uyğunlaşmanı daha da asanlaşdırır.
İdman.biz
