Idman.biz
"Motivasiya baxımından yaxşı hazırlaşmışdıq və oyunda da bunu qoruyub saxlaya bildik".
Bunu "Araz-Naxçıvan"ın futbolçusu Patrik Andrade "Sabah" komandası ilə 2:2 hesablı heç-heçə etdikləri Azərbaycan Premyer Liqasının IX tur matçından sonra jurnalistlərin suallarını cavablandırarkən deyib.
Həmin müsahibəni təqdim edirik:
– Oyun haqqında fikirləriniz necədir?
– Biz oyundan əvvəl bilirdik ki, çətin olacaq. Hesabda iki dəfə geri düşsək də, geridönüş edə bildik. Ağır qarşılaşmadan 1 xalla ayrılmağı bacardıq. Çox xoşbəxtik.
- Uzatma dəqiqələrində gələn qolla məğlubiyyətdən yaxa qurtardınız. İkinci dəfə hesabda geri düşdükdən sonra yenə bərabərlik qolunu vuracağınıza ümidləriniz var idi?
- Motivasiya baxımından yaxşı hazırlaşmışdıq və oyunda da bunu qoruyub saxlaya bildik. Son dəqiqədə də qol vuraraq, heç-heçəni təmin edə bildik.
– Qol vurmaqda problem yaşamırsınız, amma sadə qollar buraxırsınız. Problem nədədir?
– Razıyam. Sadə qollar buraxsaq da, bunların üzərində çox işləyirik. Düşünürəm ki, səhvlərimizi analiz edib düzəltməliyik. Nə səhv etdiyimizi diqqətlə izləyəcəyik və bunun üzərində işləyəcəyik.
– Oyunu evdə keçirməli idiniz, amma səfərdə oynadınız. Fərq hiss olundumu?
– Xeyr, heç bir fərq hiss olunmadı. Evdəki kimi oynadıq, bu barədə şikayətimiz yoxdur.
– Hakimliklə bağlı nə deyə bilərsiniz?
– Bu mövzu barədə danışmağı uyğun hesab etmirəm.
– Növbəti oyun "Sumqayıt"la olacaq. Bu qarşılaşma haqqında nə düşünürsünüz?
– Qarşımızda bir həftə vaxt var. Bizim üçün fərq etmir, hər oyuna eyni ciddiyyətlə hazırlaşırıq.
– "Sabah" turnir cədvəlində ən yaxın rəqiblərinizdən biridir. Bu xalin gələcəkdə nə qədər vacib olacağını düşünürsünüz?
– Biz addım-addım irəliləyirik, uzağa baxmırıq. Əsas olan hər oyunda yaxşı çıxış edib mübarizəni davam etdirməkdir.
– Keçmiş komandanız "Qarabağ"ın Çempionlar Liqasındakı oyunları barədə nə düşünürsünüz?
– Bəli, onları izləyirəm, çox yaxşı formadadırlar və sabiq komandama uğurlar arzulayıram. Ümid edirəm ki, belə davamiyyətlə Azərbaycanı xoşbəxt edərlər.
