İdman.biz
Futbolumuz qol həsrətindən qurtula bilmir.
İdman.biz xəbər verir ki, 2024-cü ilin payızında qələbə qazana bilməyən Azərbaycan yığmaları qol vurmaqda da çətinlik çəkir.
Millilərimiz son 8 rəsmi matçda rəqib qapısına yol tapa bilməyib. Əsas yığma Millətlər Liqasında, qadın komandamız Avropa çempionatının pley-off, digərləri seçmə mərhələsində çıxış edib. Hədəfi itirən komandalarımızın son qolu oktyabrın 25-də vurulub.
Həmin gün qadın millimiz Portuqaliyaya 1:4 hesabı ilə məğlub olub. Yeganə qolumuza 58-ci dəqiqədə Nazlıcan Parlak imza atıb.
Amma Parlakın qolundan sonrakı günlər heç də parlaq alınmayıb. "Liv Bona Dea"dakı görüşdən sonra 5 fərqli yığmamız meydana çıxsa da, ümumilikdə 8 görüşdə fərqlənə bilməyib.
Nazlıcanın 58-ci dəqiqədə hesab 0:3 olanda fərqləndiyini nəzərə alsaq, komandalarımız ümumilikdə 752 dəqiqədir qol axtarışındadır. Bu müddətdə rəqiblər nə az, nə çox – 31 qol vurub. Bunlardan biri Portuqaliya ilə görüşün son 32 dəqiqəsinə, digərləri son 8 matça təsadüf edib.
Bu oyunlarda kişi və qadınlardan ibarət əsas millilərimiz hərəyə bir, U-19, həm oğlan, həm qızların U-17-si hərəyə iki qarşılaşmaya çıxıb. 8 qarşılaşmada bir heç-heçə və 7 məğlubiyyət yaşanıb ki, yenilgilərdən 6-sı darmadağınla olub.
29 oktyabr. Qadınlar. Portuqaliya – Azərbaycan – 4:0
30 oktyabr. U-17 (qızlar). Serbiya – Azərbaycan – 10:0
2 noyabr. U-17 (qızlar). Azərbaycan – Lüksemburq – 0:3
13 noyabr. U-19. Azərbaycan – İslandiya – 0:2
13 noyabr. U-17. Macarıstan – Azərbaycan – 4:0
16 noyabr. U-19. İrlandiya – Azərbaycan – 4:0
16 noyabr. U-17. Yunanıstan – Azərbaycan – 3:0
16 noyabr. Əsas milli. Azərbaycan – Estoniya – 0:0
Qeyd edək ki, sabah üç yığmamız növbəti oyununa çıxacaq. Əsas milli İsveç, U-19 Moldova, U-17 Rumıniya ilə üz-üzə gələcək.
Vüqar Xeyrullayev
İdman.biz
