Idman.biz
İslandiya millisinin müdafiəçisi Viktor Palsson 2026-cı il dünya çempionatının seçmə mərhələsi çərçivəsində Bakıda Azərbaycan yığmasına qarşı keçiriləcək oyun ərəfəsi gözləntilərini bölüşüb.
İdman.Biz xəbər verir ki, futbolçu Fotbolti.net portalına müsahibəsində komandasının Reykyavikdə baş tutan ilk qarşılaşma ilə müqayisədə bu dəfə tamamilə fərqli oyuna hazır olduğunu bildirib.
Qeyd edək ki, həmin görüşdə ilk qolu birinci hissənin sonunda məhz Palsson vurmuşdu. Görüş isə Azərbaycan millisinin 0:5 hesablı məğlubiyyəti ilə başa çatmışdı.
"Qarşıdakı oyun mənə çox maraqlı gəlir. Bu, birinci matç kimi olmayacaq: biz onların meydanındayıq və rəqibin yeni baş məşqçisi var", - V. Palssonun söyləyib.
O, səfər matçının çətin olmasına baxmayaraq, islandiyalıların yalnız qələbə üçün oynayacağını vurğulayıb:
"Biz nə özümüzə həddindən artıq güvənirik, nə də keçmiş nəticələrə baxırıq. Sadəcə bu oyunu qazanmaq niyyətindəyik və bunu gizlətmirik. Eyni zamanda düşünməməliyik ki, bura gəldik və hər şey asan olacaq", - deyə V. Palsson bildirib.
Müdafiəçi Arnar Qunnlauqssonun rəhbərliyi altında komandanın irəliləyişindən məmnunluğunu da ifadə edib:
"Məncə, hər şey doğru istiqamətdə gedir. Əlbəttə, kiçik uğursuzluqlar olur, amma ümumilikdə vəziyyət yaxşıdır və biz düzgün yoldayıq. Arnar detallara çox diqqət yetirir və bu, bizə xoşdur. Oyunumuzun nə qədər müxtəlifləşdiyini görmək sevindiricidir", - V.Palsson qeyd edib.
Onun sözlərinə görə, baş məşqçi və futbolçular bir-birindən öyrənir və komandadakı ab-hava müsbət olaraq qalır:
"Ən xoş olan budur ki, bizdən istədiklərini yerinə yetirə bilirik. Biz daim öyrənirik, o da həmçinin. Deyərdim ki, bu yolda irəliləyişimiz çox müsbətdir", - futbolçu əlavə edib.
Xatırladaq ki, Azərbaycan və İslandiya yığmaları arasında oyun noyabrın 13-də, cümə axşamı günü keçiriləcək və Bakı vaxtı ilə saat 21:00-da başlayacaq.
Teymur Tuşiyev
