Idman.biz
"Kəpəz"in braziliyalı hücumçusu Luis Paçunun futbolinfo.az saytına müsahibəsi
– Misli Premyer Liqasının 31-ci turunda Şamaxı səfərindən məğlub (1:2) qayıtdınız. Bu görüşdə uğurlu nəticəyə imza atmağınız üçün nə çatışmadı?
– Əslində, yaxşı oyun göstərdik və qələbəyə layiq idik. Amma bu, futboldur, hər şey kiçik detallardan asılıdır. Meydançanı uğurlu nəticə ilə tərk etmək istəyirdik, lakin alınmadı.
– Bu görüşdə adınızı tabloya yazdıra bilsəniz də, vurduğunuz qol "Kəpəz"in uğurlu nəticəsi üçün yetərli olmadı. Bu kimi hallarda fərqləndiyinizə görə çox sevinə bilmirsiniz, yoxsa sizin üçün məğlub olduğunuz matçlarda belə qol vurmaq daha böyük önəm kəsb edir?
– Hücumçu üçün qol vurmaq həmişə yaxşıdır. Amma mənim oyunlarıma baxanda da görünür ki, komanda üçün oynayan futbolçuyam. Yəni komandamın sərfəli nəticəsi mənim üçün hər şeydən öndə gəlir.
– Oyundan əvvəl və ya sonra sabiq baş məşqçiniz, vaxtilə "Turan Tovuz"da bir yerdə işlədiyiniz Ayxan Abbasovla dialoqunuz oldumu?
– Bəli, matçdan əvvəl onunla qısa dialoqumuz oldu. Salamlaşdıq və bir-birimizin əhvalını soruşduq. Başqa söhbətimiz olmadı.
– Növbəti turda "Zirə"ni qəbul edəcəksiniz. Rəqib hazırda yaxşı formadadır. Bu görüşdən hansı nəticəni gözləyirsiniz?
– Hər oyuna olduğu kimi, bu matça da qələbə qazanmaq məqsədilə çıxacağıq. Bütün görüşlərdə 3 xal üçün mübarizə aparırıq. Bizi nə qədər çətin oyun gözlədiyini bilirik, çünki "Zirə" güclü komandadır. Amma biz də yaxşı oynayırıq, inamlı təsir bağışlayırıq. Bu görüşə tam hazır olmaq üçün məşqlərdə əlimizdən gələni edirik.
– Cari mövsümün sonuna 5 tur qalıb və "Kəpəz" sonuncu pillədə yer alan "Səbail"i 8 xal qabaqlayır. Bu, Gəncə klubunun növbəti mövsümdə də Premyer Liqada iştirak edəcəyini deməyə əsas verir, yoxsa son 5 tur da sizin üçün gərgin keçəcək?
– Mövsümün əvvəlindən qarşımıza qoyulan məqsədə çatmaq istəyirik. Yanaşmamız dəyişməyib: öz üzərimizdə işləməyə davam etmək və mümkün qədər çox xal toplamaq. İnanıram ki, "Kəpəz" növbəti mövsümdə də Premyer Liqada olacaq.
– Növbəti mövsümlə bağlı planlarınız necədir? Yeni mövsümdə də sizi "Kəpəz"in heyətində görəcəyik, yoxsa başqa təklifləri dəyərləndirməyi düşünürsünüz?
– "Kəpəz"lə müqaviləmin müddəti cari mövsümün sonunda bitir. Amma hazırda bu barədə düşünmürəm. Məşqçilər korpusu və komanda yoldaşlarımla birlikdə qarşıya qoyulan məqsədə çatmağa fokuslanmışam.
İdman.biz
