Sport24.az
CEYHUN ƏLİYEV
Hər hansısa bir futbolçu barədə danışarkən...
Veteran futbolçuların dediklərini xatırlayarkən...
İcazənizlə...
Mən, Ceyhun Əliyev 23 ildi idman jurnalistikasındayam.
Məmmədəli Quliyev 32 ildi neft buruqlarında çalışır.
Həsənağa Turabov 50 il teatr və kinoya möhürünü vurub...
Rəşid Behbudov Azərbaycan musiqisinin korifeyidir...
Və sair, və ilaxır, və... Salam...
Dostlar, məgər hər kəs çalışdığı sahədə lider olmağa can atmır?
Dostlar, məgər hər kəs çalışdığı sahədə fəaliyyətinə görə məvacib almır?
Dostlar, məgər hər kəs çalışdığı sahədə fəaliyyətini tamamladıqdan sonra pensiya almır?
Nədi bu hay-küy? Qara Qarayev "Qarabağ"da simvola çevrilə bilərdi, amma Maksim Medvedevdən fərqli, Ağdam klubunun əbədi rəqibinin formasını geyinməyi üstün tutdu. Zaman göstərdi ki, doğru addım atıb. Çünki Maks əvvəldən simvol olmaq istəyirdi, Qara isə əvvəldən qətiləşdirmişdi ki, "Qarabağ"ın siması olmayacaq...
Nə "Qarabağ"ı qınayın, nə də "Neftçi"ni. Bilirsiniz niyə? Kimsə Aydın Bağırovun kapitanı olduğu Qol.az saytında xoşbəxt ola bilər, kimsə Əli Sahibin Fanat.az-ında, kimsə də Mahir Rüsrəmlinin "Futbol+" qəzetində. Elələri də var ki, hər üçündə xoşbəxt olur. Yetər ki, yazıları dərc olunsun. Bax, Qara da hər yerdə xoşbəxtdi. Yetər ki, futbol oynasın...
