Otar Aptsiauri: "Kəpəz"dəki ab-hava uyğunlaşmağı asanlaşdırdı

"Kəpəz"in gürcüstanlı yarımmüdafiəçisi Otar Aptsiaurinin Futbolinfo.az saytına müsahibəsi

- "Kəpəz"in yeni transferlərindən birisiniz. Adaptasiya prosesi necə keçir? Komandaya tam uyğunlaşa bilmisiniz?

- İlk növbədə, klub rəhbərliyinə və məşqçi heyətinə mənə göstərilən etimada görə təşəkkür etmək istəyirəm. Burada insanlar futbola böyük sevgi ilə yanaşırlar. Çox gözəl mühitlə qarşılaşdım, bu da məni xoşbəxt etdi. Burada ailə ab-havası var, bu səbəbdən uyğunlaşma mənim üçün çətin olmadı.

- Ölkəmizə gələnə qədər "Kəpəz" və Azərbaycan futbolu haqda hansı məlumatlara sahib idiniz?

- Mənim dostlarım bu klubda oynayıblar. Buna görə də "Kəpəz"in əla azarkeşlərə sahib, çox yaxşı klub olduğunu bilirdim. Amma burada gördüklərim gözləntilərimi aşdı, bu da üzərimə böyük məsuliyyət qoyur. Azərbaycan futboluna gəldikdə isə çox yaxşı çempionatınızın olduğunu və hər il inkişaf etdiyini bilirəm. Bu da mənim üçün vacib faktordur.

- "Kəpəz"də sizə qədər oynamış dostlarınız kimlərdir?

- Mate Kvirkviya və Rati Ardazişvilini nəzərdə tuturam. Hər ikisini çoxdan tanıyıram. "Kəpəz"ə gəlməzdən əvvəl hər ikisi ilə danışıb məsləhətləşdim.
Keçən mövsüm çempionatda qalmaq uğrunda oynayan "Kəpəz"in yeni sezonda iddiasını artıracağı gözlənilir. Komanda bunun öhdəsindən gələ biləcək?
Hər şeyi zaman göstərəcək. Tək bir şeyi deyə bilərəm ki, komandada əla atmosfer var, birliyimiz güclüdür və heç bir futbolçu əlindən gələni əsirgəmir. Hər kəs komandanın uğuru üçün bütün bacarığını ortaya qoymağa hazırdır.

- Azərbaycanda uzun müddət qalmağı planlaşdırırsınız? Sizcə, burada öz sözünüzü deyə biləcəksiniz?

- Bəli, bu, mənim həyatımda yeni bir mərhələnin başlanğıcıdır. Əminəm ki, sözümü deyəcəyəm və "Kəpəz" azarkeşlərini sevindirəcəyəm. Üzərimdə böyük məsuliyyət hiss edirəm. Azarkeşlər bilsinlər ki, komandanın uğur qazanması üçün əlimdən gələni edəcəyəm.

- Gürcüstan yığması hazırda Azərbaycan millisindən güclü olsa da, Gürcüstan klubları Azərbaycan klublarından geri qalırlar. Bunun səbəbini nədə görürsünüz?

- Məncə, bu məsələdə bir çox amil rol oynayır. Təəssüf ki, hazırda Gürcüstanda bir çox klubda sabitlik problemi var. Bu da klublarımızın Azərbaycan klublarından geridə qalmasına səbəb olur.

İdman.biz