Idman.biz
Yay fasiləsində Qırğızısıstanın "Uzgen" klubuna transfer olunan Orxan Əliyevin futbolinfo.az saytına müsahibəsi
– Yeni klubunuza uyğunlaşma prosesi necə gedir?
– Adaptasiya prosesi yaxşı keçir, demək olar ki, artıq uyğunlaşmışam.
– "Uzgen"i seçməyinizin əsas səbəbi nə idi? Başqa təkliflər də var idimi?
– Başqa təkliflər də var idi, lakin seçimimi "Uzgen"dən yana etdim. Menecerimlə məsləhətləşdim və nəticədə bu qərara gəldik. Düşünürəm ki, karyeram üçün doğru qərarı vermişəm.
– "Uzgen"də artıq ikinci oyununuzu keçirmisiniz. "Alqa" və "Talant"la matçlar barədə təəssüratlarınız necədir?
– Çox vacib qələbələr oldu. Komanda olaraq yaxşı oynadıq və üstün tərəf biz idik. Qələbəyə layiq idik. Öz üzərimdə daha çox işləyirəm ki, komandama daha çox faydam dəysin.
– Legioner futbolçu olaraq ardıcıl iki matçda qol vurdunuz. Hədəfiniz nədir?
– Qol vurmaq həmişə xoş hissdir. Əsas odur ki, komandama kömək etdim. Sevinirəm ki, qolum qələbəyə töhfə verdi. Bu, mənim üçün motivasiyadır. Növbəti oyunlarda da qol və qollar vurmaq üçün öz üzərimdə çalışıram. Məşqçilər korpusunun və mənə inananların inamını boşa çıxarmayacağama ümid edirəm. Əsas məqsədim komandaya maksimum fayda vermək və mümkün qədər çox qələbə qazanmaqdır. Hər matçda özümü yaxşı tərəfdən göstərməyə çalışıram.
– "Turan Tovuz"dan ayrılmağınız bir qədər gözlənilməz oldu. Bu qərar Kurban Berdıyevdən yetərincə şans almamağınızla bağlı idi?
– Əslində komandada qalmalı idim. Lakin təklif gəldikdən sonra məsələni müzakirə etdim. Berdıyev ilə də danışdım və o, mənə icazə verdi. Bundan sonra təklifi qəbul etdim. Eyni zamanda legioner həyatı yaşamaq istəyim də bu qərarımda mühüm rol oynadı.
– Qırğızıstan liqası barədə əvvəlcədən məlumatınız var idimi?
– Bəli. Araşdırdıqdan sonra gördüm ki, həm ölkə, həm də liqa inkişaf mərhələsindədir. Burada futbolsevərlər çoxdur və oyunlara maraq böyükdür.
– Karyeranızla bağlı yaxın gələcək üçün əsas planlarınız nələrdir?
– Əsas məqsədim özümü yaxşı tərəfdən göstərmək, komandama fayda verməkdir. Gələcəkdə daha güclü klublardan təklif gözləyəcəm.
– Bizim çempionatda legioner limiti aradan qalxdıqdan sonra komandalar yerli oyunçulara çox az şans verir. Hətta yığmanın baş məşqçisi Fernandu Santuş milliyə çağırmağa futbolçu tapmadığını, legioner futbolçulara üstünlük verə biləcəyini deyib. Bu, sizin üçün motivasiya yaradırmı?
– Əlbəttə, bu, mənim üçün böyük motivasiyadır. Çox istərdim ki, milliyə dəvət alım. Bunun üçün də çox çalışıram, hansı ölkədə oynamağımdan asılı olmayaraq, əsas məqsədim daim yüksək səviyyədə çıxış etməkdir.
İdman.biz
