Idman.biz
"Turan Tovuz"dan ayrıldıqdan sonra Qırğızıstanın "Ozgon" klubuna keçən Orxan Əliyevin Sportal.az-a müsahibəsi
- "Turan Tovuz"da nəyə görə qalmadın? Halbuki bu klub sənin üçün qışda "Kəpəz"ə transfer məbləği də ödəmişdi. "Turan Tovuz"da qala bilərdin?
- Əlbəttə ki, rahatlıqla "Turan Tovuz"da qala bilərdim. Çünki mənim klubla daha bir illik müqaviləm var idi. Bu, mənim qərarım idi.
- Kurban Berdiyev sənə lazımı qədər güvəndi, yoxsa çox da şans vermədi və daha çox oynamadığın üçün oradan ayrıldın?
- Bəlkə də, "Turan Tovuz"a keçidim o qədər də uğurlu deyildi. Amma Kurban Berdıyev mənim üçün çalışmaq istədiyim ən yaxşı mütəxəssislərdən biridir. Təəssüf ki, futbolda hər zaman, hər şey istədiyin kimi getməyə bilər. Amma sizə deyim ki, seçim etməmişdən əvvəl onunla məsləhətləşmişdim. O, mənə haqqımda çox gözəl sözlər dedi. Hansı ki, bu sözlər məni daha da motivasiya edir. Kurban Berdıyevə anlayışı üçün təşəkkürümü bildirirəm.
- Necə düşünürsən, "Turan Tovuz" bu mövsüm avrokuboklara düşə biləcək?
- Ümidvaram ki, "Turan Tovuz" bu mövsüm avrokuboklara vəsiqə qazanacaq. Onlara uğurlar arzulayıram.
- Qırğızıstanın "Ozgon" klubuna keçidin reallaşdı. Transfer haqda nə deyəcəksən? Təklif yalnız Qırğızıstan klubundan idi?
- Xeyr, mənə Azərbaycan klublarından da təklif gəlmişdi. Amma şərtlər uyğun gəlmədi. Qırğızıstanın digər klublarından da dəvət olmuşdu. Menecerim Qvanzav Maqomedov "Ozgon"a keçmək variantını təklif etdi. Onlar da öz şərtləri ilə məni maraqlandırdı. Üstəlik, klub rəhbərliyi və məşqçilər korpusu da məni öz klublarında görmək istəyirdilər. Belə olduqdan sonra təbii ki, keçid reallaşdı.
- Qırğızıstan klubunda əsas hədəf nə olacaq? Hansı şərtlərlə bu komandaya keçdin?
- Komanda ilk dəfədir ki, yüksək liqada çıxış edir. Qarşıya o qədər də böyük hədəflər qoyulmayıb. Amma bizim yaxşı komandamız var. Fikrimcə, mövsümün sonuna qədər özümüzü ən yaxşı tərəfdən göstərəcəyik.
- Bu yay Qırğızıstana yollanan azərbaycanlı futbolçuların sayı çox oldu. Səncə, bu nə ilə əlaqədardır? Qırğızıstan klubları azərbaycanlı futbolçulara bu qədər çox güvənir?
- Özünüz də görürsüz ki, nə qədər azərbaycanlı Qırğızıstana gəlib. Hansı ki, onlar özlərini burada ən yaxşı tərəfdən göstərə bilər. Bu, onlar yaxşı şansdır. Bildiyiniz kimi, demək olar ki, bütün futbolçuları bura menecerim və yaxın dostum Qvanzav Maqomedov gətirir.
- Qırğızıstan futbolunun səviyyəsi, çempionatın səviyyəsininecə hesab edirsən? Azərbaycandan aşağı səviyyədədir?
- Azərbaycan və Qırğızıstan futbolunun səviyyəsini müqayisə etsək, hələ ki Qırğızıstan futbolu geridədir. Amma burada futbol çox sürətlə inkişaf edir və düşünürəm ki, tezliklə burada yaxşı səviyyədə futbol olacaq. Qırğızıstanın prezidenti və Qırğızıstan Futbol Federasiyasının rəhbəri futbolun inkişafına çox diqqət ayırır. Özünüz baxın da, ötən mövsüm yüksək liqada 10 komanda var idi, bu mövsüm 14 oldu. Yeni mövsümdən isə 16 klubun olacağı ehtimal edilir. Bu barədə nəsə danışmağa ehtiyac yoxdur, hər şey göz qabağındadır.
- Debüt oyununda "Asiaqol" komandasına qol vurdun, görüşü də 2:0 qalib gəldiz. Bu haqda nə deyəcəksən?
- Debüt görüşündə qol vurduğuma görə şadam. Qalib gəldik, bu da xüsusi sevincdir. Amma hər şey hələ indi başlayır. Öz üzərimdə hələ çox işləməliyəm. Çünki böyük hədəflərim var. Bununla dayanmaq olmaz. Çalışmaq və irəliyə baxmaq lazımdır. Hər şey alınacaq.
İdman.biz
