Sport24.az
Mövsümlərarası fasilədə uzun müddət özünə klub tapa bilməyən Orxan Əliyev ötən həftə "Kəpəz"lə ortaq məxrəcə gəldi. Ancaq hələ ki, futbolçu yeni komandasında özünü göstərə bilməyib. İki oyunda meydana çıxan hücumçunun "ayağı açılmayıb". 28 yaşlı futbolçu Sport24.az-a müsahibəsində
- Son müsahibəndə Albaniyada legioner həyatı yaşamağa yaxın olduğunu demişdin. Amma sonda "Kəpəz"lə anlaşdın. Ölkə xaricinə yollanmağına nə mane oldu?
- Bəli, legioner həyatı yaşamaq istəyirdim. Ancaq qarşı tərəf məsələni çox uzatdı. Hər dəfə deyirdilər bir qədər də gözlə. Vaxt uzandıqca formadan düşürdüm. Belə olduqda "Kəpəz"dən real təklif gəldi və geri çevirmədim.
- "Turan Tovuz"la matçda əvəzetmədən meydana daxil olsan da, "Səbail" ilə görüşdə ilk dəqiqələrdən iş başında idin...
- Baş məşqçimizə mənə etimad edib şans verdiyi üçün təşəkkür edirəm. Təəssüf ki, məğlub olduq. Gəncəyə xalla qayıtsaydıq, mənim üçün daha əlamətdar olardı.
- "Səbail"lə böyük hesabla məğlubiyyətin səbəbini nə ilə izah edərdin?
- Bayıla yaxşı nəticə üçün gəlmişdik. Oyuna da pis başlamadıq. Amma ilk qoldan sonra planlarımız pozuldu. Bundan sonra nə qədər çalışsaq da, hesabı dəyişə bilmədik. Əksinə daha qol gördük. Əlbəttə ki, 4 oyuna məğlubiyyət xoş deyil. Heç kim belə nəticə arzulamırdı.
- Xal qazanmamaqla yanaşı, komanda hələ də fərqlənə bilməyib. Hücumda "dişsizliyin" səbəbi nədi?
- Hücuma qura bilirik, sadəcə, son nöqtəni qoymaqda çətinlik çəkirik. Bütün komanda buna görə məyusdu. Xal qazanmağı bir kənara qoyaq, qolda vura bilməyəndə özümüzə inam azalır. Ən azı bir qol vursaq bizdə özünəinam əmələ gələr. Ardıcıl 4 turda rəqib qapısına yol tapa bilməyən, bütün görüşləri məğlub başa vuran komandanın futbolçusu kimi danışmaq çox çətindi. Qarşıdakı oyunlarda həm qol vurmaq, həm də qələbə qazanmaq istəyirik.
- Bu gedişlə zirzəmidə qalacağınızdan çəkinmirsən?
- İndidən təslim olmaq barədə düşünsək gərək meydana çıxmayaq. Pessimiz yol vermək lazım deyil. Belə davam edə bilməz. "Kəpəz" elitada qalmağa layiqdi. İrəlidə 32 tur var. Hər turda döyüşəcəyik ki, autsayder olmayaq.
- Bu gün az da olsa "ASCO Arena"da gəncəli azarkeş var idi. Oyundan sonra onlar komandaya etirazını bildirdilər. Fanatlarla 20 dəqiqəlik söhbətdə nə danışdız?
- Gəncə həm futbolu, həm də çılğın azarkeşləri ilə seçilir. Nizami yurdunda fanatlar həmişə komandanın yanında olublar. Təbii ki, haqlı olaraq nəticələrdən narazıdılar və bizi qınayırlar. Məhz belə fanatlarımıza görə "Kəpəz"i ayaqda saxlamaq üçün qarşıdakı turlarda daha əzmlə mübarizə aparacağıq.
ABDULLA İSMAYILOĞLU
