Orxan Əliyev: "Albaniyada çempionatında özümü yaxşı tərəfdən göstərə bilərəm"

Ötən mövsüm "Araz-Naxçıvan" əsas "qol silah"ı olan, meydana çıxdığı 32 matçda 9 qol, 3 məhuldar ötürmə ilə yadda qalan Orxan Əliyev hələ də klubsuzdu. Hücumçunun niyə hələ də özünə klub tapa bilməməsi maraqlıdı? Bunun səbəbini öyərnmək üçün Orxanla danışmağı lazım bildik. 28 yaşlı futbolçu Sport24.az-a müsahibəsində qısa vaxtda yeni klubu ilə anlaşacağını bildirməklə yanaşı, bizi maraqlandıran başqa sualları da cavablandırıb.

- Ölkə çempionatında iki tur arxada qalsa da, hələ də klubsuzsan. Bu nə vaxtda kimi davam edəcək?
- Bu danışıqlar prosesinin uzanmasıyla əlaqədardı. Agentlərim həm yerli, həm də əcnəbi klublarla danışıq aparır. Tələsik qərar vermək istəmirik.  

- "Araz-Naxçıvan"dan ayrılmağının səbəbi nə və ya kim oldu?
- Bəzi şərtlər oldu ki, razılığa gələ bilmədik. Amma klubla danışıqlarımız hələ davam edir.

- Xaricdən təkliflərin olduğunu dedin. Konkret hansı ölkəyə üz tutmaq varinatı var?
- Bir neçə ölkə təmsilçisi xidmətimdə maraqlıdı. Amma əsas söhbət Albaniya klubuyla gedir.

- Vaxtilə yığmamızın sabiq üzvü Rauf Əliyevin Albaniyada karyerası uğursuz alınmışdı. Vüsal İsgəndərlinin də Balkan təmsilçisində məcarəsi uzun çəkmədi. Eyni aqibəti yaşamaqdan qorxmursan?
- Futbolda nəyin necə olacağını öncədən bilmək olmaz. Raufun Albaniyada işlərinin uğursuz olması, o demək deyil ki, mən də eyni aqibəti yaşayacam. İsgəndərli isə "Eqtaniya"da heç də pis mövsüm keçirmədi. Sadəcə, karyerasını Türkiyədə davam etdirməyi lazım bildi. Hazırda Zamiq Əliyev də Vüsalın sabiq komandasında formasını geyinir. Fikrimcə, ortaq məxrəcə gələ biləsək, Albaniyada çempionatında özümü yaxşı tərəfdən göstərə bilərəm.

- Klubsuz qalmaqla formadan da düşürsən...
- Fərdi məşqlər edirəm. Maksimum çalışıram ki, çəkim artmasın. Böyük ehtimalla, avqustun sonuna kimi yeni klubumun adına aydınlıq gələcək.

- Premyer Liqada artıq iki tur geridə qalıb. Yeni mövsümlə bağlı fikirlərini bilmək maraqlı olardı...
- Hələ çempionat yeni başlayıb. Ümumi götürəndə dinamika pis deyil. Komandalar istəklidi. Turlar ötdükcə daha gərgin oyunlara şahidlik edəcəyik.

- "Araz-Naxçıvan" - "Şamaxı" qarşılaşmasını izləyənlər arasında idin. Görüş meydan sabiq komandanın 1:0 hesablı qələbəsi ilə başa çatdı. Futbolçu yox, bir  azarkeş kimi oyundan zövq ala bildin?
- heç bir komanda uduzmaq istəmirdi. Ümumi götürəndə hər iki kollektiv yenidən formalaşmaqdadı, heyətlərində yeni oyunçular var. Sadəcə, rəqiblə müqayisədə "Araz-Naxçıvan"  topa daha çox nəzarət edirdi və bundan istifadə edərək qələbə qazandı.

- "Qarabağ" ÇL-da doğma meydanda məğlub olsa da, səfərdə darmadağınlı qələbə qazandı. Cavab qarşılaşmasında ağdamlılardan nəticə gözləyirdin?
- bakıda baş tutan ilk görüşdə heç kim "Qarabağ"ın məğlub olacağını gözləmirdi. Təmsilçimiz nə qədər yaxşı çıxış etsə də, səmimi etiraf etmək lazımdır ki, "Ludoqorets"də sıradan bir komanda deyil. Bolqarlar uzun illərdi avrokuboklarda sabit çıxış edir. Yetəri qədər də güclü, səviyyəli klubdu. Amma şükürlər olsun ki, cavab matçında təmsilçimiz  xarakter göstərək rəqibini sıradan çıxardı. Açığı, ilk görüşdən sonra da Ağdam təmsilçisinin mərhələ keçəciyi inanırdım. Lakin hesabın 7:2 olacağını gözləmirdim.

- "Qarabağ"ın uğurlu çıxışını Konfrans Liqasında "Zirə" ilə "Sabah" davam etdirə biləcəkmi?
- Hər iki təmsilçimizə inanıram. Düzdü, "Sabah" bir qədər müdafiədə boşluqlar verir və bunun acısını yaşayır. Buna rəğmən onların toparlanıb cavab oyununda irlandiyalılara qalib gələcəyinə ümid edirəm. Ümumi götürəndə iki klubumuzun mərhələ keçmək şansları var. Onların taleyi öz əllərindədir.

ABDULLA İSMAYILOĞLU