Idman.biz
"Bəli, klub mənə yeni müqavilə təklif edib. Onlar klubda qalmağı istəyirlər".
Bunu Qırğızıstanın "Ozgon" klubunun hücumçusu Orxan Əliyev sportal.az-a müsahibəsində deyib.
Həmin müsahibəni təqdim edirik:
– Artıq Qırğızıstan liqası başa çatdı. "Ozgon"dakı karyeranız necə alındı? Necə dəyərləndirirsiniz?
- Ümumi götürsək, yaxşı dəyərləndirmək olar. Çünki doqquz meydana çıxdıq, yeddi qol vurdum və bir məhsuldar ötürmə etdim. Məncə, hər şey normal keçdi.
– Qırğızıstan liqasında az qol vurmadınız. Sizcə, mövsümün əvvəlindən orada oynasaydınız, daha çox qol vura bilərdiniz?
- Fikrimcə, bəli. Qırğızıstana mövsümün əvvəlindən gəlsəydim, daha çox qol vura bilərdim. Mən zədə səbəbindən hələ dörd oyuna da çıxmadım. Özünüz də, statistikaya baxa bilərsiz. Liqadakı statistikam qısa müddətdə etdiyim çempionatın ən yaxşılarından biridir.
- Qırğızıstan çempionatı Azərbaycan Premyer Liqasından çox fərqlənir?
- Qırğızıstan liqası inkişaf edir və bəyəndiyim çempionatdır. Əgər onlar yanaşmalarında daha peşəkar olsalar, tez bir zamanda uğur qazanacaqlar. Azərbaycan Premyer Liqasını da izləyirdim. Səviyyə yüksəlir. Sadəcə istənilən halda, 5-6-cı sıralarda qərarlaşan komandaların heyətində yerli futbolçular az oynayır.
– Bəs siz özünüz "Ozgon"da qalacaqsınız? Klub sizə yeni müqavilə təklif edib?
- Bəli, klub mənə yeni müqavilə təklif edib. Onlar klubda qalmağı istəyirlər. Yaxın vaxtlarda yekun qərarımı verəcəm. Hələ ki tam qərarımı verəmişəm.
– Azərbaycan Premyer Liqasından necə, təkliflər almısınız? Hansı klublardan təklifləriniz var?
- Azərbaycan Premyer Liqasından heç kim mənimlə danışmayıb. Hazırda Premyer Liqada mübarizə davam edir. Qırğızıstanda isə çempionat noyabrın 9-da başa çatmışdı. Bəlkə Azərbaycandan təklif gələcək, birlikdə görəcəyik.
– Özünüz hansı addımı atacaqsınız? Qırğızıstanda qalmaq istəyirsiniz, yoxsa Azərbaycana qayıtmağı planlaşdırırsınız?
- Məni görməkdən məmnun qalacaqları yerdə olacam. Beləliklə, məni istəyən komanda üçün nə qədər vacib olub-olmadığımı bilməliyəm. Zaman hər şeyi göstərəcək.
