Idman.biz
Azərbaycan Respublikasının Prezidenti, Milli Olimpiya Komitəsinin Prezidenti İlham Əliyev dekabrın 26-da Azərbaycanda idmanın inkişafında xidmətləri olan idmançılar və idman mütəxəssislərini mükafatlandırıb.
İdman.Biz bildirir ki, ölkə rəhbəri fəxri adlarla yanaşı, il ərzində yüksək nailiyyətlər qazanmış bir qrup idmançıya və idman mütəxəssisinə yeni mənzillərin orderlərini təqdim edib.
Mənzillə mükafatlandırılanlardan biri Olimpiya növləri üzrə milli komandalar üçün Təlim məşq mərkəzinin direktoru, Azərbaycan Futbol Veteranları İttifaqının sədri Oqtay Abdullayevdir. Abdullayev Sportnet.az-a müsahibəsində Prezident İlham Əliyevlə etdikləri söhbətə də diqqət çəkib.
- Prezident İlham Əliyevlə söhbətinizdə onu futbol oynamağa dəvət etdiniz. Bu barədə ətraflı danışardınız...
- Cənab Prezident Milli Olimpiya Komitəsinin rəhbərlik etməyə başladığı 1997-ci ildən sonrakı ilk illərdə həftənin iki günü - bazar ertəsi və cümə axşamı, işi olduğu vaxt həftədə bir dəfə birlikdə futbol oynayırdıq. Oyunlar işdən sonraya təsadüf edirdi. Ötən gün bizimlə görüşü zamanı yenə futbol oynamağa gəlməsini xahiş etdim. O, əvvəlcə elə başa düşdü ki, milli komandanın oyununu izləməyə gəlməsini istəyirik. "Gələrəm, birdən uduzarlar, pis olarıq" cavabını verdi. Mən isə "özümüz oynamaq üçün" söylədim. Qocaldığını bildirdikdə "Hara qocalırsınız? Cavansınız" dedim. Daha sonra oynadığı vaxtlardan neçə il keçdiyini soruşdu. Dedim ki, 27-30 il. O, vaxtın çox tez keçdiyini, mən isə "Vaxt keçmədi, uçdu" söylədim. Aramızda bax, bu cür söhbət oldu. Mən orada cənab Prezidenti "Siz Azərbaycanı dünyada tanıtdırdınız, belə bir qüdrətli dövlətin olduğunu bəyan etdiniz, üzümüzü ağ etdiniz" sözləri ilə təbrik etdim. O da təşəkkürünü bildirdi. Görüş zamanı futbol oynadığı illəri yada saldıq.
- Dövlət başçısının "Gələrəm, uduzarlar, pis olarıq" sözlərini milli komandaya bir mesaj kimi də qəbul etmək olarmı?
- Əlbəttə, cənab Prezident millinin nəticələrindən narazıdır. Bunu hamı, o cümlədən, cavabdeh şəxslər də bilirlər. Amma oyunlara gəlsə, daha yaxşı olar, futbolçular daha da ruhlanar, ikiqat qüvvə ilə oynayar, uğurlu nəticə göstərə bilərlər.
- Prezident İlham Əliyev sizə mənzil də verdi. Bu barədə nə deyə bilərsiniz?
- Minnətdaram ki, xidmətlərimi nəzərə alaraq, məni üçotaqlı mənzillə təmin etdi. Hər ilin sonlarında cənab Prezident idmançılar və idman xadimlərini mənzil və fəxri adlarla mükafatlandırır, qiymətləndirir. Gənclər və idman naziri Fərid Qayıbov nailiyyətləri və xidmətləri yüksək olan şəxslərin siyahısını ölkə rəhbərliyinə təqdim edir. Yəni, burada cənab nazirin də rolu böyükdür. Sizin vasitənizlə Fərid müəllimə də təşəkkürümü bildirirəm. AFFA-nın mənimlə bağlı məktubunu nazirliyə vermişdim. Nazirliyimiz də kimin ehtiyacı varsa və xidmətləri, nailiyyətləri böyükdürsə, onu qeyd etmişdi. Minnətdaram ki, bu vəzifədə uzunmüddətli fəaliyyətimi qiymətləndirdilər, Yeni İl öncəsi ailəmizi sevindirdilər. Bununla əlaqədar AFFA-ya da təşəkkürümü bildirdim.
