Sport24.az
"Yığma komanda belə zəif oyun göstərməməlidir". Bu sözləri Sport24.az-a açıqlamasında veteran futbolçu Oqtay Abdullayev deyib.
70 yaşlı keçmiş oyunçu Haiti ilə keçirilmiş yoldaşlıq oyunu (0:3) ilə bağlı fikirlərini bölüşüb:
"Bu ölkə futbolu üçün böyük ləkədir. Haiti yaxşı komandadır. Amma biz bu oyuna izlədik, komanda oynamadan məğlub oldu. Adam xəcalət çəkir ki, bizim komandamız sanki birinci dəfə futbol oynayır. Bu dərəcədə zəif oynadılar".
O. Abdullayev baş məşqçi Fernandu Santuşun işi barədə danışıb:
"Haiti ilə oyun hər şeyi göstərdi. Onun işi barədə artıq danışmağa ehtiyac yoxdur. Mənim şəxsi fikrim belədir ki, hazırda yığmaya azərbaycanlı baş məşqçi lazımdır. Nə qədər olsa, ölkəni sevən biri olacaq. Çalışacaq ki, özünü göstərsin. Bizim Pro kateqoriyalı yetəri qədər yaxşı mütəxəssislərimiz var. Arif Əsədov və Tərlan Əhmədovu misal göstərə bilərəm. Bizim komandamız geriyə gedir. Futbolçularda potensial var. Amma niyə oynaya bilmirlər? Onu bilmirəm. Çox zəifik. Bu gün Belarusla oyunda komandadan qələbə gözləyirik. Buna inanırıq. Əvvəlki oyundan nəticə çıxartmalıyıq".
