Report.az
"Omoniya" kollektivi "Araz-Naxçıvan"la oyuna ciddi hazırlaşıb.
"Report" xəbər verir ki, bunu "Omoniya"nın (Kipr) baş məşqçisi Harninq Berq UEFA Konfrans Liqasının III təsnifat mərhələsində "Araz-Naxçıvan"a qarşı keçirəcəkləri ilk oyundan öncə mətbuat konfransında deyib.
Norveçli mütəxəssis sabah çətin oyuna çıxacaqlarını bildirib:
"Araz-Naxçıvan" çox yaxşı komandadır. "Aris"lə oyunlarını izləmişik. Rəqibimizə qarşı ciddi hazırlaşmışıq. Rəqibin heyətində keyfiyyətli futbolçular var. Həmin oyunçular meydanda bir-birilərini çox yaxşı anlayırlar. Hər oyunda bir komanda favorit hesab edilir. Lakin məşqçilər bu məsələyə fərqli yanaşırlar. Kim güclüdürsə, o da qalib gələcək. "Araz-Naxçıvan"ın növbəti mərhələyə yüksəlməyi təsadüfü deyildi. Onlar ötən mərhələdə keçirdikləri iki görüşdə də yaxşı çıxış etmişdilər. Şansları dəyərləndirə bilməyəcəm. Amma sizə onu deyim ki, "Aris" "Araz-Naxçıvan"a qalib gəlsəydi, "Omoniya" ilə qarşılaşmanın favoriti hesab ediləcəkdi. İndi özünüz düşünün "Araz-Naxçıvan" - "Omoniya" matçının favoriti kimdir".
Qeyd edək ki, "Araz-Naxçıvan" - "Omoniya" matçı avqustun 7-də "Dalğa Arena"da, saat 20:00-da start götürəcək. Cavab görüşü bir həftə sonra Nikosiyada təşkil olunacaq.
