Sport24.az
"Mövsümün ilk oyununda doğma meydanda məğlub olduq. Ona görə də II turda qarşımıza qələbə qazanmaq məqsədi qoymuduq. Çətin də olsa, 3 xal qazandıq. Bu qələbə qarşıdakı oyunlarımız üçün yaxşı motivasiya olacaq". Bu sözləri Sport24.az-a açıqlamasında Ömər Buludov deyib.
Bu yay Naxçıvan klubuna keçən oyunçu mövsümlərarası fasilədə yeni kollektiv formalaşdığını, bu üzdən futbolçuların bir-birinə tam uyğunlaşmadığını da vurğulayıb: "Bu gün meydanda istədiyimiz kimi çıxış edə bilməməyimizin əsas səbəbi futbolçuların bir-birinə tam uyğunlaşa bilməməsidi. Yenidən qurulan komandayıq, uyğunlaşma mərhələsini arxada qoysaq, həm oyunumuz, həm də nəticələrimiz yaxşılaşacaq".
25 yaşlı müdafiəçi sonda onu da bildirib ki, oyunu ilə yenidən millinin məşqçilər korpusunun diqqətini cəlb etmək istəyir: "Milliyə yeni baş məşqçi təyin olunub. Ümid edirəm ki, Fernandu Santuşun təyinatı ölkənin əsas komandası üçün uğurlu olacaq. Yenidən millidə şans qazanmaq istəyirəm. Bunun üçün üzərimdə maksimum işləyib portuqaliyalı mütəxəssisin diqqətini cəlb etməyə çalışacam".
Qeyd edək ki, dünən keçirilən oyunda "Araz-Naxçıvan" "Şamaxı"nı minimal hesabla məğlub edib.
ABDULLA İSMAYILOĞLU
