Idman.biz
Türkiyənin "Qalatasaray" komandasının baş məşqçisi Okan Buruk UEFA Çempionlar Liqasının əsas mərhələsinin VI turunda "Monako"ya qarşı oynanacaq vacib oyun öncəsi II Lui stadionunda media qarşısına çıxıb.
İdman.Biz xəbər verir ki, Buruk komandanın son dönəmdə həm sıx oyun təqvimi, həm də zədə və cəza problemləri ilə ciddi çətinliklər yaşadığını etiraf edib. Mütəxəssis ardıcıl matçları eyni futbolçularla oynadıqlarını deyərək heyət darlığının performansa təsir etdiyini vurğulayıb.
Okan Buruk bildirib ki, "Monako" ilə görüş komandanın Çempionlar Liqasındakı taleyini müəyyənləşdirəcək:
"Bu, çox önəmli matçdır. Futbolçularıma tam güvənirəm. Səfərdə alınacaq hər xal dəyərlidir, amma bizim düşüncəmiz yalnız qələbədir".
Məşqçi rəqibin son oyunlarda sistem dəyişiklikləri etdiyini və buna uyğun analiz apardıqlarını qeyd edib. Burukun sözlərinə görə, "Monako"nun heyətində keyfiyyətli futbolçular var və fransız təmsilçisinin müdafiə gücü xüsusi diqqət tələb edir.
Komandanın zədə problemi son günlər Buruku ən çox düşündürən məsələ olub. Jakobsun zədədən sonra tam hazır olmadığını, Sinqonun isə iki mövqedə istifadə edildiyini bildirən məşqçi, bəzi oyunçuları ağrılarla oynatmağa məcbur qaldıqlarını deyib:
"Bəlkə də "Qalatasaray"dakı ən çətin günlərimdir. Müdafiə xəttində tamamilə çarəsiz qaldığınız anlar olur. Bir neçə bölgədə dəyişiklik edə biləcək futbolçumuz belə yoxdur. Dörd gündə bir eyni oyunçularla oynayırıq. Dinlənməli olan futbolçuları dincəldə bilmirik. Jakobs, Berkan və Yunus Akgün ağrılarla oynayır. Risk alırıq, çünki məcburuq".
Təcrübəli çalışdırıcı həmçinin "Monako" stadionunda 2000-ci ildə qazanılan tarixi UEFA Kubokunu xatırladaraq, bu arenanın "Qalatasaray" üçün xüsusi anlam daşıdığını bildirib: "
İnşallah o il olduğu kimi bu dəfə də sevindirici bir axşam yaşayaq".
