Idman.biz
Türkiyənin "Qalatasaray" komandasının baş məşqçisi Okan Buruk klubun Milan "İnter"inin yarımmüdafiəçisi Davide Frattezi ilə maraqlanması barədə yayılan məlumatlara münasibət bildirib.
İdman.Biz xəbər verir ki, türkiyəli mütəxəssis "Fanatik"ə açıqlamasında Frattezi ilə bağlı heç bir danışıqlar aparılmadığını və hazırda bu profildə oyunçunun klubun əsas transfer hədəfi olmadığını deyib.
"Transferləri nə qədər gizli saxlasan, bir o qədər yaxşıdır, amma təəssüf ki, bizim ölkədə bu çətindir. Bizim maraqlandığımız futbolçularla bağlı xəbərlər çıxır, eləcə də maraqlanmadığımız oyunçularla bağlı. Frattezi vacib, dəyərli futbolçudur. Onunla bağlı heç bir danışıqlar aparılmayıb. O, mənim çox xoşuma gəlir, amma hələ heç bir addım atmamışıq. Hazırda bu profildə oyunçu əsas hədəfimiz deyil. Mətbuatda çoxlu futbolçu ilə bağlı söz-söhbət yayılır, onların 20-30 faizi doğrudur, qalanları isə bizim ümumiyyətlə tanımadığımız, danışmadığımız oyunçulardır. Transfer baxımından əsas məqsədimiz yaxşı, ən yaxşı oyunçuları cəlb etməkdir. Bunun üçün həm klubu, həm də futbolçunu inandırmaq lazımdır", - deyə Buruk bildirib.
20:00
Türkiyənin "Qalatasaray" klubu İtaliyanın "İnter" komandasının yarımmüdafiəçisi Davide Frattezi ilə ciddi maraqlanır.
İdman.Biz-in insayder Canluka Di Marzionun məlumatına istinadən xəbər verir ki, İstanbul klubu bu transfer üçün 35 milyon avroya (70 milyon AZN) qədər vəsait yatırmağa hazırdır.
Söhbət futbolçunun məcburi sonrakı satınalma şərti ilə icarəyə götürülməsindən gedir.
Qeyd olunur ki, bu cür sxem "İnter"i tam qane edir, çünki klub müəyyən göstəricilərdən asılı olan şərtlərlə transferdənsə, oyunçunun zəmanətli satışına üstünlük verir.
Davide Frattezi 2023-cü ilin iyulundan "İnter"in formasını geyinir. O, həmin vaxt "Sassuolo"dan 31,4 milyon avroya (62 milyon AZN) transfer olunub. Cari mövsümdə yarımmüdafiəçi bütün turnirlər üzrə 15 oyunda meydana çıxıb və iki məhsuldar ötürmə ilə yadda qalıb.
