Idman.biz
"Dünən oyuna ona görə çıxmadıq ki, komanda 4 aydır maaş almır. Ayıb deyilən bir şey var. Bir klub bunu necə edə bilər?"
Bu sözləri QOL.az-a açıqlamasında Azərbaycan ikinci liqasında mübarizə aparan "Şəki Siti"nin futbolçusu Nurlan Novruzov deyib.
İdman.Biz bildirir ki, "Şəki Siti" ötən gün ikinci liqanın 13-cü turunda "Qaradağ Lökbatan"la qarşılaşmalı idi. Ancaq klub oyunun başlanma saatından bir qədər əvvəl komandanın matça çıxmayacağını açıqlayıb. Səbəb isə göstərilməyib.
Komandanın təcrübəli hücumçusu N.Novruzov klubu qeyri-peşəkarlıqda ittiham edərək bildirib ki, növbəti turun oyununa da çıxmayacaqlar:
"Bunlar çempionatın əvvəlində maliyyə meyarını göstərməyib ki, filan qədər büdcəni komandaya ayırıram? Ayrılan pul futbolçuların mövsümün sonuna qədər maaşları və digər xərclər üçündür. Bu gün klub rəhbərliyi deyir ki, 270 min manat ortalıqda yoxdur. Futbolçular da 4 aydır maaş almırlar. Başa düşmürəm ki, PFL hara baxır? Futbolun İnkişafı Fondu da bu məsələdə məsuliyyət daşıyır. Niyə demirlər ki, bu pullar hanı? Həqiqədən klubda durum elə biabırçı vəziyyətdədir ki, danışılası deyil. Hansı ki, komandada Premyer Liqa səviyyəsində futbolçular var. Sonra deyirik ki, bizdə niyə futbolçu yetişmir. Çünki futbolçular bu cür məhv edilir. Komanda növbəti oyuna da çıxmayacaq. Necə çıxaq? Dörd aydır ki, komanda maaş almır.
Bu klubdan elə şeylər danışaram ki... Hansı ki, bir neçə il əvvəl olurdu belə şeylər. Klub rəhbərliyi futbolçularla bir müqavilə bağlayır, PFL-lə başqa. Dünyada görünməyən şeyləri Azərbaycan 2-ci liqasında görürəm, şoka düşürəm. Niyə buna nəzarət edilmir?
N.Novruzov qeyd edib ki, belə klublar çempionata buraxılmamalıdır: "Əlbəttə ki, ən böyük günah klub rəhbərliyindədir. Niyə belə klub rəhbərlərinə hələ də güvənilir? Neçə illər belə rəhbərliklər azərbaycanlı futbolçuları pis günə qoydular. Hələ də davam edir. Niyə? Bu gün futbolun inkişafı üçün rəhbərlikdə futbolu sevən insan olmalıdır. Danışanda deyirlər ki, cəmi 300 min manat büdcə var. Bu məbləğ 2-ci liqa üçün az pul deyil. Bu üç ayın içində 300 mini yox edənlərə də "halal" olsun. Bəs düşünmürlər ki, sabah bizdən bunun sorğusu olacaq. Qətiyyən bu haqda düşünmürlər. Çox rahatdırlar.
Başım ağrısa da, deyəcəm ki, yəqin, bunların arxasından duranlar var ki, belə hoqqa verirlər. Həqiqətən biabırçılıqdır. Soruşun ki, futbolçularınız hardadır? Biri fəhləlik edir, biri rayonda tarlada işləyir, biri taksi sürür. Onlar da bezib. Qınamıram, bəzilərinin ailələrinin durumu yaxşı deyil. Eləsi var ki, övladına uşaq bezi ala bilmir. Həqiqədən də adamın ürəyi ağrıyır. Burda danışmaq olmur, əlimizdən gələn köməkliyi də edirik. Amma hara qədər? O qədər istedadlı futbolçularımız var ki... Onlara çox heyfim gəlir".
Klub rəhbərliyini belə sərt ittiham edən N.Novruzov "Şəki Siti"dən ayrılmadığını bildirib: "Mən elə klubda ola-ola danışıram. Heç nədən qorxum yoxdur. Çünki durum çox acınacaqlıdır. Son illərdə klub sayının artması, regionlarda futbolun dirçəlməsi çox sevindiricidir. AFFA bu sahədə çox böyük iş görüb. PFL rəhbərliyində də tanıdığım adlar var ki, onların futbolu çox sevdiyini bilirəm. Yəqin ki, onların baş verənlərdən xəbəri yoxdur".
N.Novruzov klubun ona olan borcunu da açıqlayıb: "4 aydır ki, maaş vermirlər. Mənim 8 min manat alacağım var. Özünüz düşünün. Artıq heç fikir də vermirəm".
