Sport24.az
"Azarkeşlərimizin dəstəyi ilə MOİK-lə oyunda qələbə qazanmaq istəyirdik, amma hər şey bizim üçün pis alındı. Matça istədiyimiz kimi başlaya bilmədik. Məşqdə elədiklərimizin heç birini meydanda həyata keçirə bilmədiyimiz üçün rəqibə qalib gələ bilmədik". Bu sözləri Sport24.az-a açıqlamasında "Qaradağ Lökbatan"ın futbolçusu Nurlan Novruzov deyib.
O, Birinci Liqanın 25-ci turunda məğlub olduqları (0:1) MOİK-lə oyun haqda fikirlərini bölüşüb:
"Çox qol epizodlarımız olur. Məşqlərdə çatışmayan cəhətlərin üzərində işləyirik, çox əziyyət çəkirik. Amma bunu heç kim görmür. Qol fürsətlərini dəyərləndirə bilməməyimizin səbəbi şanssızlıqdır. İki oyunumuz qalıb ki, onların hər ikisi bizim üçün finala bərabərdir. Əvvəlcədən çox söz demək olar, önəmli olan meydanda işin öhdəsindən gəlməkdir".
Təcrübəli futbolçu mövsüm başa çatmamış artıq təkliflərin olduğunu bildirib:
"Bəli, başqa təkliflərim var. Ancaq indi bütün fikrimi qarşıdakı iki matça yönəltmişəm. Ondan sonra bu barədə düşünə bilərəm".
Qeyd edək ki, "Qaradağ Lökbatan" 25 turdan sonra 22 xalla sonuncu pillədədir.
