Sport24.az
Elmar Baxşıyevin baş məşqçisi olduğu "Araz-Naxçıvan" addım-addım ilk "üçlüy"ə yaxınlaşır. Muxtar Respublika təmsilçisi son oyunda səfərdə "Turan Tovuz" məğlub etməyi bacardı. Naxçıvanlıların portuqaliyalı legioneri Nuno Rodriges Sport24.az-a müsahibəsində həm Qərb səfərindən danışıb, həm də bizi maraqlandıran başqa sualları cavablandırıb.
- Ardıcıl 3 oyundu ki, meydanı qələbə ilə tərk edirsiz. Uğurun sirrini bilmək istərdik...
- Bunun xüsusi sirri yoxdur. Komandanın hər gün çalışır, məşqlərdə çox tər tökür və meydanda sona qədər mübarizə aparır. Hər matçın öz tapşırığı olur. Çalışırıq ki, Baxşıyevin məşq prosesində verdiyi göstərişləri oyun zamanı tətbiq edək. Onun dediklərini düzgün yerinə yetirdikcə, nəticə də özünü çox gözlətmir. Yəni qələbə qazanmaq üçün bacarığımızı əsirgəmirik.
- "Turan Tovuz" camiəsi qələbənizdə hakimin rolu olduğunu düşünür. Bu barədə nə deyərdin?
- Heç bir halda hakimin qərarı müzakirə olunmur. Çünki meydanda onun verdiyi qərarlar hamı üçün keçərlidir. Onlar da çalışır öz işlərini görsünlər və görürlər. Bütün komandalar oyun zamanı səhv edə bilir. "Turan Tovuz"la oyuna gəldikdə, qələbəyə layiq idik. Çox şükür, onu da əldə etdik. Tovuz təmsilçisi ilə qarşılaşmada hakimin qərarının nəticəyə heç bir təsiri olmadığını düşünürəm. Hətta bununla bağlı Hakimlər komitəsinin rəhbəri də açıqlama verib.
- Uğurlu seriyanın davam etdirmək çətin olmayacaq?
- Komandanın məqsədi növbəti oyunlarda qalib gəlib, hər gün inkişaf etməkdir. Diqqətimizi buna yönəltməliyik. Oyundan-oyuna nəticəmizi yaxşılaşdırmağa çalışırıq. Hədəfimiz hər oyunda qələbə qazanmaq, mümkün qədər turnir cədvəlinin üst pillələrində qərarlaşmaqdır.
ABDULLA İSMAYILOĞLU
