Idman.biz
"Hesabda önə keçdikdən sonra daha diqqətli olmalıydıq. Təəssüf ki, qapımızda qol gördük və qələbəni əldən verdik. Lakin bu, futboldur. Rəqiblər də qələbə qazanmaq istəyir. Heç nə olmaz. Yolumuza davam edirik".
İdman.biz xəbər verir ki, bunu Futbolxeber.az-a açıqlamasında "Sumqayıt"ın yarımmüdafiəçisi Nikola Ninkoviç Azərbaycan Premyer Liqasının üçüncü turunda "Şamaxı"ya qarşı keçirdikləri oyun (1:1) barədə danışarkən deyib.
O bildirib ki, çempionatdakı fasilədən maksimum faydalanmağa çalışacaqlar: "Fasilə hamı üçün faydalı olacaq. 3 yaxşı oyun keçirdik. İndi bir qədər istirahət etməli, daha sonra tam gücümüzlə çalışmalıyıq".
Ninkoviç mövsümün startının komandası üçün uğurlu alındığını bildirib: "3 oyuna 7 xal yaxşı nəticədir. Üstəlik, nəzərə alsaq ki, rəqiblərimizdən biri "Qarabağ" olub. Lakin bu, sadəcə mövsümün startıdır. Əsas məsələ bunun ardını gətirməkdir".
34 yaşlı futbolçu növbəti turda qarşılaşacaqları "İmişli" ilə görüşdən də söz açıb: "Fasilədə ciddi çalışmalı, növbəti matçlara daha yaxşı hazırlaşmalıyıq. "İmişli" ilə görüş də çətin olacaq. Ümumiyyətlə, heç bir oyun asan keçmir. Bununla belə, istənilən halda məqsədimiz qalib gəlmək, xal ehtiyatımızı artırmaqdır".
Serb futbolçu "Sumqayıt"ın baş məşqçisi olan həmyerlisi Saşa İliç barədə də danışıb: "Təbii ki, İliçlə birgə işləməkdən məmnunam. "Sumqayıt"da çox gözəl ab-hava var. Baş məşqçimiz də çox çalışır, hər gün bizimlə söhbətlər aparır. Arzu edirəm ki, daha yaxşı çıxış edəcək və qələbələr qazanaq".
İdman.biz
