Idman.biz
"Atletik Bilbao"nun hücumçusu Niko Uilyamsın ötən yay "Barselona"ya keçməməsinin səbəbləri ilə bağlı yeni məlumatlar üzə çıxıb.
İdman.Biz xəbər verir ki, həm Bilbao, həm də Barselona mətbuatında yayılan ziddiyyətli xəbərlərin arxasında gizli danışıqlar, agentin mövqeyi və Joan Laportanın təsadüfi açıqlamaları dayanır.
13 iyun 2025-ci il tarixində klub 25 milyon avroluq ödənişi (təxminən 46,2 milyon AZN) La Liqaya göndərməyə hazırlaşırdı ki, "Espanyol" qapıçısı Joan Qarsiya rəsmən "Barselona"nın oyunçusu olsun. Lakin eyni gün Deko saat 15:00-da "Hotel Torre Melina"da gizli toplantı təyin etmişdi. Burada Niko Uilyamsın agenti Feliks Tainta və ona yaxın bir şəxslə danışıqlar aparılırdı. Bu görüşdə oyunçunun katalon klubuna keçmək istəyi açıq şəkildə ifadə olunur.
Bir həftə əvvəl, 8 iyunda isə Niko Uilyamsın agenti "Bavariya"nın idman direktoru Maks Eberl ilə görüşür və almanlar oyunçunu transfer etməkdə çox israr edirlər. Həmin günün gecə yarısı agent Deko ilə əlaqə qurmaq istəyir, lakin müəyyən səbəblərdən əlaqə qura bilmir. Ertəsi gün danışıq zamanı Deko Barselonada görüş təklif edir və agent bunu tərəddüdsüz qəbul edir. Bu, danışıqlarda üstünlüyün artıq futbolçu tərəfində olmadığını göstərirdi.
"SPORT" görüşün xəbərini dərc etdikdən sonra agent bunu tam şəkildə təkzib edir və guya Barselonaya Billi Eilişin konsertinə görə gəldiyini deyir. Amma jurnalistin sualı onun bəhanəsinin saxtalığını ortaya çıxarır.
Yanında "musiqiçi dost" kimi təqdim olunan şəxs isə əslində Feliks Taintanın yaxın adamı Xuan de Dios Karrasko olub, iki il əvvəl Uilyamsın "Barselona"ya transferi üçün vasitəçilik etmiş şəxs.
Xəbəri Fabrizio Romano və David Ornstein də paylaşır. Agent isə Bilbao mediasına eyni anda təkzib göndərir, bu, görüşün əslində baş tutduğunu dolayı yolla təsdiqləyirdi.
İyulun 3-də axşam Joan Laporta Pedralbesdə restoranda yemək yeyərkən bir fanat soruşur: "Prezident, Niko niyə çətinlik yaradır?"
Laporta cavab verir: "Agent azadolma maddəsi istəyir. Biz 60 milyon avro (111 milyon AZN) ödəyib sonra pulsuz getməsinə imkan verməyəcəyik. Heç nə yekunlaşmayıb"
Bu açıqlama klubun artıq prosesdən narahat olduğunu açıq göstərirdi.
Cəmi 12 saat sonra rəsmi açıqlama yayılır: "Niko Uilyams 2035-ci ilə qədər yenilənmə imzaladı. Yeni azadolma məbləğ 100 milyon avrodur (təxminən 185 milyon AZN)".
"Barselona" ofislərində isə ciddi məyusluq yaranır. Klub yay boyu transferin mümkün olduğunu düşünürdü.
Dörd ay sonra yollar yenidən kəsişir. Bu şənbə yenilənmiş "Spotify Camp Nou"nun açılışında Niko Uilyams həmin komandaya qarşı oynayacaq. Keçmək istədiyi, amma sonda yenidən "Atletik"i seçdiyi kluba qarşı.
