Idman.biz
Almaniya millisinin və "Milan" klubunun hücumçusu Niklas Fulkruqun son illərdə keçdiyi yol futbol dünyasında nadir rast gəlinən hekayələrdən biri hesab olunur.
İdman.Biz xəbər verir ki, hücumçu cəmi bir neçə il ərzində karyerasında möhtəşəm dönüş edib.
29 yaşına qədər Almaniyanın 2-ci Bundesliqasında çıxış edən Fulkruq, məhz həmin yaşında komandası ilə yüksək liqaya yüksəlib və ilk Bundesliqa mövsümündə özünü göstərərək Almaniya millisinin heyətinə dəvət alıb. O, DÇ-2022-də meydana çıxaraq dünyanın ən böyük turnirində qol da vurub.
30 yaşında Bundesliqanın bombardiri adını qazanan futbolçu, 31 yaşında artıq Dortmund "Borussiya"sının futbolçusu kimi Çempionlar Liqasının finalına yüksəlib və həm 1/4 finalda, həm də yarımfinalda qollarla yadda qalıb.
Eyni ildə Almaniya millisinin heyətində Avropa çempionatında da çıxış edən Fulkruq həmin turnirdə də qol vurmağı bacarıb.
32 yaşında isə İngiltərə futbolunda qısa müddətlik çıxışdan sonra İtaliyanın nəhəng klublarından biri olan "Milan"a transfer olunaraq karyerasında daha bir zirvəyə çatıb.
2022-ci ildə Almaniya futbolunun ikinci divizionunda oynayan Niklas Fulkruq bu gün - 2026-cı ilin əvvəlində əminliklə deyə bilər ki, Bundesliqanın bombardiri olmuş, Çempionlar Liqasının finalında oynamış, dünya və Avropa çempionatlarında qol vurmuş və "Milan" kimi nəhəng kluba transfer edilmiş futbolçu kimi tarixə düşüb.
