Idman.biz
"Püşkatmada bəxtimiz gətirmədi. Bizi çətin qarşılaşmalar gözləyir. Təlim-məşq toplanışlarında daha yaxşı hazırlaşmağa çalışacağıq ki, ölkəmizi layiqincə təmsil edə bilək".
İdman.biz xəbər verir ki, bu sözləri AZƏRTAC-a açıqlamasında 17 yaşadək qadın futbolçulardan ibarət Azərbaycan millisinin baş məşqçisi Nərgiz Qurbanova Avropa çempionatının birinci mərhələsinin püşkünü dəyərləndirərkən deyib.
Mütəxəssis B Liqasının 1-ci qrupunda yer alan yığmamızın hazırkı durumundan və turnirdəki şanslarından bəhs edib: "2008-ci il təvəllüdlü uşaqlar artıq komandadan ayrılıb. Bu il 2009-2010-cu il təvəllüdlü oyunçularla çıxış edəcəyik. Ümidimizi bu qızlara bağlamışıq. Yeni yaş qrupu olduğu üçün komandanın durumunu təlim-məşq toplanışından sonra müəyyənləşdirə biləcəyəm. Uels və Kosovo seçmələri ötən il A qrupunda yarışmışdılar. Təəssüf ki, bu dəfə bizimlə eyni qrupa düşdülər. Amma bu o demək deyil ki, biz bu komandaların qarşısında heç nə edə bilməyəcəyik. Onlar arasında seçim etməli olsaq deyə bilərik ki, hər iki rəqib də favoritdir. Amma Uelsi xüsusi fərqləndirmək istərdim. Bu iki kollektivin oyun üslubunu izləyib, təhlil etməmişəm. Amma ümumi nəticələrə baxdıqda görünən odur ki, Uels Kosovodan üstündür. Təbii ki, oyunları analiz etdikdən sonra daha dəqiq məlumat vermək olar. Bu yığmaya da yeni yaş qrupundan qızlar gələcək. Moldovaya gəldikdə isə bu komandanın bizə tanış olduğunu deyə bilərik. Ötən turnirlərdə də onlarla qarşılaşmışıq. Sonuncu matçımızda 4:1 hesabı ilə qalib gəlmişdik. Amma bu o demək deyil ki, rəqibə yuxarıdan aşağı baxmaq olar. Dediyim kimi, hər il yaş qrupu yeniləndiyi üçün rəqiblərin hazırkı durumu ilə bağlı danışmaq çətindir".
Qeyd edək ki, görüşlər bu ilin payızında keçiriləcək. Turnirin təşkil olunacağı ölkə və tarix hələlik bəlli deyil.
İdman.biz
