Sport24.az
"Neftçi"ni digər klublardan fərqləndirən nədir? Yəqin ki, bu suala hərənin özünə görə bir cavabı var. Kimsə tarixi qabardıb ölkənin ən köklü klubu olduğunu söyləyəcək, kimsə Azərbaycan futbolunun əfsanəsi Anatoli Banişevskinin adını çəkəcək. Bəziləri dövlət tərəfindən maliyyələşdirildiyini vurğulayacaq. Kimsə də ölkənin sayılıb-seçilən, tanınmış futbolçularının hər birinin nə vaxtsa bu klubla yollarının kəsişdiyini qeyd edəcək.
Heç şübhəsiz ki, bu cavabların hər birində həqiqət payı var. Hər nə qədər son illər "Neftçi" uğursuz çıxış etsə də, bu ölkədə "ağ-qaralar"a bir sevgi, hörmət var. Futbolumuzun ən yaşlı klubu ölkənin hansı bölgəsinə səfər etməyindən asılı olmayaraq, həmin gün həmin şəhərdə, rayonda futbol bayramı yaşanır, qələbəliyin şahidi oluruq. Necə deyərlər, Dövlət bəyin ölüsü də gözəldir...
Deyəsən, bir qədər haşiyə çıxdım. Bizim əsas məqsədimiz "Neftçi"ni digər klublardan fərqləndirən səbəbi tapmaq idi axı. Fikrimcə, bu sual ətrafında çox baş sındırmağa ehtiyac yoxdur. Subyektiv fikrimi deyəcəm ki, bəlkə də "Qarabağ", artıq tarixin yaddaşına köçmüş "Xəzər Lənkəran", "Kəpəz", "Sumqayıt" və digər klubların azarkeşləri məndən inciyəcək. Ancaq subyektiv fikirimi deyəcəm: Azərbaycan futbolunun 88 yaşlı ağsaqqalını digərlərindən fərqli edən azarkeşləridir. Bəli, azarkeşləri...
Neçə illərdir ki, "Neftçi" uğursuz çıxışı ilə azarkeşlərini üzür, nəticələri ilə fanatlarını məyus edir. Ancaq onların komandaya olan sevgisi bitmir, məhəbbəti tükənmir.
Dünən sosial şəbəkələrdə "Neftçi" fanatlarının klubun məşq bazasına yürüşünü, onların futbolçularla görüşünü izlədim. Necə emosianal və çılğın görünürdülər... Sanki 19 yaşlı gənc sevdiyini qıza ürəyini açırdı, məhhəbbətini izhar edirdi... İzlədim və bir daha şahidi oldum ki, nəsillər, futbolçular, hətta formalar dəyişir. Yeganə dəyişməyən "Neftçi" azarkeşləridir. "Ağsaqqal"a 1937-ci ildə necə hörmətlə yanaşırdılarsa, indi də həmin vəziyyətdir.
"Neftçi"nin formasını geyinən hər kəs, klubda çalışan istəniən şəxs bu sevginin qarşılığını verməlidir, azarkeşi qələbələrlə sevindirməlidir. Azarkeş "Neftçi"nin ən böyük sərvətidir, göz bəbəyidir... Edəcəklərmi? Etməyə borcludurlar!
