Idman.biz
Bu gün, yanvarın 9-da BƏƏ-nin Abu-Dabi şəhərində keçirilən təlim-məşq toplanışı çərçivəsində baş tutacaq Bakı təmsilçisi "Neftçi" ilə Qazaxıstanın "Kayrat" klubları arasındakı yoxlama oyunu iki komandanın sovet dövründən başlayan zəngin qarşıdurma tarixində növbəti fəsil olacaq.
İdman.Biz xəbər verir ki, SSRİ dövrünün bütün rəsmi turnirləri - SSRİ çempionatı, SSRİ Kuboku və SSRİ Futbol Federasiyası Kuboku nəzərə alındıqda, komandalar indiyədək bir-biri ilə 70 oyun keçiriblər. 18 yanvar 2008-ci ildə Antalyada keçirilən və 2:2 hesabı ilə başa çatan yoxlama görüşü də nəzərə alınarsa, bugünkü qarşılaşma bu rəqabətdə 72-ci oyun olacaq.
Sovet dövrünün rəsmi matçlarında qələbələrin sayına görə minimal üstünlük Almatı klubunun tərəfindədir. "Kayrat" 29 dəfə qalib gəlib, "Neftçi" 25 qələbə qazanıb, daha 16 görüş isə heç-heçə ilə yekunlaşıb. Topların fərqi də demək olar ki, bərabərdir - "Kayrat"ın xeyrinə 87:86.
Yalnız SSRİ çempionatları (ali və birinci liqalar) çərçivəsində keçirilən oyunlara baxdıqda, komandalar arasında 64 qarşılaşma baş tutub. Bu matçlarda "Kayrat" 27 qələbə qazanıb, "Neftçi" 23 dəfə qalib gəlib, 14 görüş heç-heçə ilə nəticələnib. Topların ümumi fərqi isə Bakı klubunun xeyrinədir - 73:72.
Bu qarşıdurmada "Neftçi"nin ən böyükhesablı qələbəsi 14 iyul 1987-ci ildə SSRİ-nin ali liqasında qeydə alınıb - 6:0. "Kayrat"ın ən böyük uğuru isə 10 oktyabr 1991-ci ilə təsadüf edir. Həmin vaxt almatılılar SSRİ-nin birinci liqasında 5:1 hesabı ilə qalib gəliblər. Bu, klublar arasında son rəsmi oyun olub. SSRİ dağıldıqdan sonra komandalar cəmi bir dəfə - yuxarıda qeyd olunan Antalyadakı yoxlama matçında üz-üzə gəliblər.
Əlavə edək ki, "Kayrat" Qazaxıstanın 2025-ci il çempionudur. Bakı təmsilçisi "Neftçi" isə hazırda Azərbaycan Premyer Liqasında turnir cədvəlinin yeddinci pilləsində qərarlaşıb.
Qarşıdakı görüş Bakı vaxtı ilə saat 17:00-da başlayacaq.
