Idman.biz
Azərbaycanın ən köklü klubu olan "Neftçi" yenə avrokuboklardan kənar qalıb.
İdman.biz xəbər verir ki, Samir Abasovun baş məşqçisi olduğu komanda 2024/25 mövsümü başa çatmamış qitəmiqyaslı turnirlərdə iştirak şansını itirib.
Bakı klubu 2025/26 mövsümündə də Avropada olmayacaq. Bu, ardıcıl ikinci dəfə yaşanacaq. Paytaxt təmsilçisi cari mövsümdə də avrokubokları kənardan seyr edib.
"Neftçi"nin tarixinə nəzər salsaq, ardıcıl iki mövsüm Avropaya çıxmamaqdan betəri olmayıb. İki il qitə kuboklarına vəsiqə qazanmamaq "ağ-qaralar"ın antirekordudur.
Bakılılar indiyədək yalnız bir dəfə ardıcıl iki ili boşa verib. 2009/10 və 2010/11 mövsümlərində Avropa qatarında "Neftçi"yə yer tapılmayıb. Həmin dövr klub tarixində ilk belə qara seriya olub.
Antirekord 15 ildən sonra təkrarlanıb. "Ağ-qaralar" üçün 2024/25 və 2025/26 mövsümləri qara rənglə başlayacaq.
"Neftçi"nin Avropadakı çıxışlarına nəzər salsaq, daha bir dəfə ardıcıl iki il qitə kuboklarına qatılmadığını görmək olar. Amma 2002/03 və 2003/04 mövsümlərini klubun passivinə yazmaq, uğursuz çıxışla bağlamaq düzgün deyil. Çünki ölkədə futbolun olmadığı dövrdə təkcə "Neftçi" deyil, Azərbaycan klubları UEFA miqyaslı turnirlərə buraxılmayıb. Bir sözlə, həmin fasilə vəsiqə qazanılmaması ilə bağlı olmayıb.
Ümumiyyətlə isə Azərbaycan klublarının Avropa səhnəsinə çıxdığı 1994-cü ildən indiyədək 10-cu dəfə "Neftçi" qitə kuboklarında olmayacaq. Bunlardan ikisində Azərbaycan bu turnirlərə buraxılmayıb. "Ağ-qaralar" tarixində 8-ci dəfə vəsiqə qazana bilməyib. Əgər iki dəfə 2 mövsümlük seriya yaşanıbsa (2009/10-2010/11 və 2024/25-2025/26), digər 4 halda bu həsrət (1994/95, 1998/99, 2006/07, 2017/18) qısa sürüb.
"Neftçi" 22 dəfə avrokuboklara qatılıb. Paytaxt təmsilçisi mübarizəyə 7 dəfə Çempionlar Liqasında, 11 dəfə Avropa Liqası (əvvəl UEFA kuboku) və 2 dəfə Konfrans Liqasında başlayıb. Digər iki start artıq keçirilməyən Kuboklar kuboku və İntertoto kubokunda gerçəkləşib.
"Neftçi" və avrokuboklar:
1994/95. Vəsiqə qazanmayıb
1995/96. Kuboklar kuboku
1996/97. UEFA kuboku
1997/98. Çempionlar Liqası
1998/99. Vəsiqə qazanmayıb
1999/2000. UEFA kuboku
2000/01. UEFA kuboku
2001/02. UEFA kuboku
2002/03. Azərbaycan təmsil olunmayıb
2003/04. Azərbaycan təmsil olunmayıb
2004/05. Çempionlar Liqası
2005/06. Çempionlar Liqası
2006/07. Vəsiqə qazanmayıb
2007/08. UEFA kuboku
2008/09. İntertoto kuboku
2009/10. Vəsiqə qazanmayıb
2010/11. Vəsiqə qazanmayıb
2011/12. Çempionlar Liqası
2012/13. Çempionlar Liqası
2013/14. Çempionlar Liqası
2014/15. Avropa Liqası
2015/16. Avropa Liqası
2016/17. Avropa Liqası
2017/18. Vəsiqə qazanmayıb
2018/19. Avropa Liqası
2019/20. Avropa Liqası
2020/21. Avropa Liqası
2021/22. Çempionlar Liqası
2022/23. Konfrans Liqası
2023/24. Konfrans Liqası
2024/25. Vəsiqə qazanmayıb
2025/26. Vəsiqə qazanmayıb
Qeyd edək ki, "Neftçi"nin avrokuboklara nəzəri şansları Misli Premyer Liqasının XXXII turunun "Sumqayıt"la sərər oyunundan (2:2) bitib.
Vüqar Xeyrullayev
İdman.biz
