Report.az
"Neftçi" Azərbaycan çempionatlarında yeni rekorda imza atıb.
"Report" Peşəkar Futbol Liqasına istinadən xəbər verir ki, bu, "ağ-qaralar"ın Misli Premyer Liqasının XXXV turunda "Səbail"i üç cavansız qolla məğlub etməsi sayəsində mümkün olub.
"Neftçi" Misli Premyer Liqasının 2024/25 mövsümündə ilk böyükhesablı qələbəsini qazanıb. "Ağ-qaralar" sonuncu böyükhesablı qələbəni də ötən mövsümün XXXV turunda, mayın 18-də, elə "Səbail"lə görüşdə eyni hesabla qazanmışdı. 365 gün əvvəlki qələbə səfərdə əldə olunub.
Bununla da "Neftçi" ölkə çempionatları tarixində 31-ci fərqli mövsümdə böyükhesablı qələbə qazanıb. Yalnız 2009/10 və 2015/16 mövsümlərində "ağ-qaralar" belə nəticəyə sevinməyib. 31 fərqli mövsümdə böyük hesabla qalib gəlməklə çempionatlar tarixində yeni rekord qeydə alınıb.
