Idman.biz
Kiprin "Apollon" klubundan Sessi D"Almeydanı heyətə qatan "Neftçi" bu komandadan daha bir oyunçunu istəyir.
İdman.biz Futbolinfo.az-a istinadən xəbər verir ki, "ağ-qaralar" komandanın fransız yarımmüdafiəçisi Şarl Boli ilə danışıqlara başlayıb.
Tərəflər artıq ilkin razılıq əldə ediblər. Əslən Fil Dişi Sahilidən olan 26 yaşlı oyunçu tezliklə Bakıya gəlməlidir.
Şarl Boli Şotlandiyada doğulub. Amma o, futbolçu karyerasına Fransada başlayıb. "Lans" futbol akademiyasında yetişən oyunçu daha sonra bu klubun əsas komandasında meydana çıxıb. Burada isə cəmi 14 oyun keçirib. 2021-ci ildə isə icarə əsasında Liqa 2-də çıxış edən "Paris" klubuna icarəyə verilib. 2021/2022-ci il mövsümünün ikinci yarısını isə o, "Viçenza"da keçirib, daha sonra Fransaya qayıdıb. Burada "Pau" klubunda iki mövsüm oynayıb, 54 matça çıxıb və 4 dəfə rəqib qapılarına yol tapıb. 2024-cü ildə Boli "Apollon"a transfer olunub. Burada o, 19 qarşılşmada meydana çıxıb, 1 dəfə fərqlənməyi bacarıb.
Görünür ki, iddialı olmaq istəyən "Neftçi" xoşbəxtliyi Kipr bazarında axtarır. Həm də sanki Limassol klubunu Bakıya köçürmək niyyəti var. Çünki Bakı klubu artıq oradan bir transfer edib və "Apollon"un digər oyunçusu Giorgios Malekkidislə də danışıqlar gedir. Şarl siyahıda 3-cüdür.
İdman.biz
