Sport24.az
Son günlər mətbuatda millinin baş məşqçisi Fernandu Santuşun postundan gedəcəyi ilə bağlı xəbərlər dolaşır. Sport24.az-ın əldə etdiyi məlumata görə, portuqaliyalı mütəxəssisin Azərbaycandan ayrılacağı gündəmdədi. Artıq onun boş qoyacağı kresloya namizədlər də var.
Onlardan biri bizlərə yeni simadısa, digəri artıq bir dəfə ölkənin əsas komandasının "sükanı arxasında" olub.
Öncə yeni namizədin kim olduğuna aydınlıq gətirək. Uzun müddət Abdulla Avcının köməkçisi olan Önder Karaveli bir neçə vaxtdı Bakının qonağıdı. O, paytaxtda olduğu müddətdə bir neçə çempionat oyununu canlı izləyib. Bəs onu buna məcbur edən nədi? Mənbəmizin sözlərinə əsasən, Öndər bəyi Azərbaycana Avcı ezam edib. Abdulla bəyə millini çalışdırmaq təklif olunub. O da təklifə "hə" deməmişdən öncə, Azərbaycan futbolu barədə ətraflı məlumat toplamaq üçün köməkçisini Bakıya göndərib.
İkinci namizəd isə Robert Prosineçkidi. 2014-cü ildən 2017-yə qədər millinin baş məşqçisi olan xorvat mütəxəssis hazırda Monteneqro millisinin "sükanı arxasında" olsa da, iş yerini dəyişməyə hazırdı. Yeri gəlmişkən, milli onun rəhbərliyi altında 23 oyun keçirib.
Və sonda əsas məsələni vurğulamaq lazımdı. Abdulla Avcı gənclər və idman nazirliyinin, Robert Prosineçki isə AFFA namizədidi. Bu yerdə ortaya sual çıxır. Bu günə qədər millinin baş məşqçisini AFFA rəhbərliyi seçibsə, nazirlik bu söhbətə niyə baş qoşur?
Fernandu Santuşun Azərbaycanda işləməsi birbaşa AFFA-nın prezidenti Rövşən Nəcəfin istəyi ilə reallaşıb. Redaksiyamıza ötürülən məlumata görə, həmin vaxt hətta İcraiyyə Komitəsində Rövşən bəylə eyni komandada yer alab bəzi şəxslər portulayalının təyinatının əleyhinə olublar. Ancaq AFFA prezidenti inadından dönməyib və Santuşu millinin baş məşqçisi postuna təyin edib. Ancaq oktyabrın 10-da 70 yaşını qeyd edən mütəxəssisin ümidləri doğrultmadığı hamıya məlumdu. Bu səbəbdən bu dəfə yuxarı dairələrdə yığmaya yeni baş məşqçi seçimi Fərid Qayıbovun rrəhbərlik etdiyi nazirliyə tapşırılıb.
İndi çox maraqlıdı, nazirlik və AFFA qarşıdurmasından kim qalib ayrılacaq?
