Idman.biz
Bu gün futbol üzrə Azərbaycan Premyer Liqasında keçiriləcək "Neftçi" - "Sumqayıt" qarşılaşması böyük maraqla gözlənilir. Çünki bu oyun hər iki komanda üçün yeni baş məşqçilərin debüt matçı olacaq. Ukraynalı mütəxəssis Yuri Vernidub üçün bu, rəsmi müqavilə əsasında ilk oyun olacaqsa, Şahin Abdullayev üçün bu məcburi addımdır. Belə ki, o, ardıcıl olaraq qırmızı vərəqə alan "Sumqayıt"ın əvvəlki baş məşqçiləri Saşa İliç və Veliçko Kaplanoviçi əvəzləyəcək.
Bəs görüşdən nə gözləmək olar və debyutant məşqçilərin dueli nə ilə bitəcək?
İdman.Biz bu sualla əslən sumqayıtlı, lakin futbolçu kimi "Neftçi"də parlamış və bu kluba bağlı olan, Azərbaycan futbolu tarixinin ən yaxşı oyunçularından biri Nazim Süleymanova müraciət edib.
"Yeni baş məşqçi ilə ilk oyunda, adətən, istənilən klubun futbolçuları özlərini bütün gücü ilə göstərməyə çalışırlar, sanki onlarda "ikinci nəfəs" açılır. Düşünürəm ki, bu matç da istisna olmayacaq və "Neftçi"ni Samir Abasovun dövründəkindən bir qədər fərqli görəcəyik. "Sumqayıt"a gəlincə, burada Şahin Abdullayev üçün iş bir qədər asandır – o, futbolçuları yaxşı tanıyır və ümid edirəm ki, oyunçular da yeni statusda ilk oyununda məşqçilərini məyus etməməyə çalışacaqlar. Ona görə də hesab edirəm ki, qarşılaşma heç-heçə ilə başa çatacaq", – deyə Nazim Süleymanov bildirib.
Vüqar Vüqarlı
