Idman.biz
Portuqaliyalı keçmiş futbolçu Nani həmyerlisi Kriştiano Ronaldonun daha uzun illər futbol oynaya biləcəyini istisna etməyib.
İdman.Biz xəbər verir ki, futbolçu Ronaldo barədə xoş xatirələrindən bəh edib.
O bildirib ki, Kriştiano artıq 1000 qola çox yaxındır: "Kriştianonu hamı gənc yaşlarından tanıyırdı. Biz çox tez başa düşdük ki, o, yaşıdlarından fərqlənir. Ronaldo məndən bir yaş böyükdür, amma mən onu artıq "Nasional"ın gənclər komandasında oynayanda tanıyırdım. O vaxt mən "Sportinq"də idim.
O, həmişə yaşıdları ilə deyil, yaşca böyük oyunçularla oynayırdı. Topla davranışı fantastik idi. O, bütün gənclər üçün ilham mənbəyi idi, çünki biz onun etdiklərini görüb eynisini təkrarlamaq istəyirdik. Ronaldo başqalarından tamamilə fərqli idi".
Daha sonra Nani Ronaldonun futbol karyerasının davamı ilə bağlı fikirlərini bölüşüb: "Kriştianonun daha nə qədər oynayacağını bilmirəm. Amma bir şey dəqiqdir, o, bədəninə çox qayğı ilə yanaşır. Düzü, insanın futbolu nə qədər oynaya biləcəyini söyləmək çətindir. Amma biz 50 yaşına qədər oynayan yapon və ya çinli futbolçular görmüşük.
Bilmirəm, Kriştianonun bu qədər uzun müddət oynamaq niyyəti varmı, amma o, məqsədlərinə çatmaq istəyir. Yəqin ki, bir neçə ildən sonra başqa işlərə yönələcək. Amma oynadığı müddətdə hər zaman maksimumunu verəcək. Və nə vaxt dayanmaq istədiyini də yalnız özü müəyyənləşdirəcək".
Qeyd edək ki, Nani və Kriştiano Ronaldo uzun illər "Mançester Yunayted" və Portuqaliya millisində komanda yoldaşı olublar.
