Idman.biz
"Yusif İmanov "Sabah"ın üzə çıxardığı qapıçıdır. Onun həm fiziki göstəriciləri, həm də çərçivədə işi qənaətbəxş olub".
İdman.biz xəbər verir ki, bunu veteran qapıçı Nadir Şükürov "Sabah" ayrılan millimizin qolkiperi Yusif İmanov barədə Sport1.az-a açıqlamasında deyib.
Mütəxəssis vurğulayıb ki, Yusif bəzi oyunlarda səhvləri ilə də diqqət çəkib, lakin səhvsiz futbolçu yoxdur və idmanın bu növündədə nöqsanlara yol verə-verə inkişaf edirsən: "Masazır təmsilçisinin yaxşı yerlərə gəlib çıxmasında Yusifin az rolu olmayıb. Onun adının klubunun iştirak ərizəsində görmədikdə çox təəccübləndim. Qapıçının gələcək karyerasına gəlincə, həm ölkə xaricində, həm çempionatımızda çıxış edə bilər".
Şükürov bildirib ki, bu gün Premyer Liqa klublarının 90 faizinin Yusif İmanov kimi qolkiperə ehtiyacı var: "Legioner həyatı yaşaması daha yaxşı olardı. Amma burada bir şərt var. O, müntəzəm şans qazanacağı və inkişaf edəcəyi xaricə kluba getməlidir. Ehtiyatda oturmaq üçün legioner həyatı yaşamağın mənası yoxdur. İstənilən halda Yusif qərar verməyə tələsməməlidir. Onun gələcəkdə daha yaxşı qapıçı olacağına inamım böyükdür".
Qeyd edək ki, millimizin qapıçısı Yusif İmanov birtərəfli olaraq "Sabah"la olan müqaviləsini ləğv edib.
İdman.biz
