Idman.biz
"Macarıstan millisi Azərbaycandan daha üstün oyun göstərdi. Bu da normaldır".
İdman.biz xəbər verir ki, bunu Azərbaycan millisinin sabiq forvardı Nadir Nəbiyev Sportal.az-a açıqlamasında deyib.
O, yığma komandamızın son matçlardakı performansını dəyərləndirib: "Macar futbolçular daha böyük klublarda, daha yaxşı çempionatlarda oynayırlar. Macarıstana uduzmaya da bilərdik. Demək olmaz ki, milli komandamız yaxşı oynadı. Amma o qədər də pis təsir bağışlamadı. Hətta Latviya yığmasına da qalib gələ bilərdik. Qalib gəlmək üçün yaxşı imkanlar da oldu. Sadəcə olaraq ələ düşən qol imkanlarından istifadə etmək lazımdır. Milli komandanın nəticə qazanmasını istəyiriksə, nələrisə dəyişmək lazımdır. Amma nəyi dəyişmək lazım olduğunu müzakirə etmək lazımdır".
Nəbiyev, milli komandamızın baş məşqçisi Fernandu Santuşun işini də qiymətləndirib: "Santuş kifayət qədər tanınmış, nəticəsi olan, yaxşı məşqçidir. Amma millimizin nəticələrinə baxanda, uğursuzdur deyə bilərik. Doğrudur, futbolçularımız son matçlara daha əzmkar, daha istəkli görünürlər. Amma əzmkar və istəkli olmaq, qələbə qazanmaq üçün kifayət deyil. Görünən odur ki, biz Fernandu Santuşla hər hansı uğur qazana bilməyəcəyik. Ona görə də vaxtı itirmədən düzgün qərar vermək lazımdır. Baş məşqçi dəyişikliyi olacaqsa, yeni gələn yerli olmalıdır. Mən Rəşad Sadıqovun millidə uğur qazana biləcəyinə çox inanıram".
İdman.biz
