Sport24.az
"Hər iki oyun maraqlı olacaq. Hər bir komandanın finala çıxmaq imkanı var. İlk oyundakı nəticəyə görə "Sabah" bir addım öndədi deyə bilərik". Bu sözləri Sport24.az-a açıqlamasında millinin sabiq üzvü Nadir Nəbiyev deyib.
Hazırda Qərb Regional Futbol Federasiyasının prezidenti postunu tutan veteran futbolçu yarımfinalının cavab qarşılaşmaları barədə fikirlərini bölüşüb:
"Birinci oyunda nəticələr elə olub ki, əlavə vaxt da ehtiyac duyula bilər. "Sabah"la "Neftçi"nin mövsümü titulla başa vurması üçün bu son şanslarıdı deyə oyunun gərgin və maraqlı keçəcəyi gözlənilir. "Araz-Naxçıvan"ın ilk oyundakı nəticəyə görə üstünlüyü olsa da, onlar üçün daha çətin olacaq. "Qarabağ" ilk dəqiqələrdən təzyiq edəcək. Naxçıvan təmsilçisi çalışacaq ki, əks hücumdan maksimum istifadə etsin. Hər iki oyun azarkeşlər üçün maraqlı olacaq. Haqq edən komanda kuboku qazansın. "Araz-Naxçıvan" və "Sabah"ın çempionatda son oyunları çətin keçib. Heyəti geniş olan komandanın nisbətən üstünlüyü ola bilər. Dörd komandanın hər birinin finala çıxmaq imkanı var. Əsas odur ki hər iki oyun maraqlı və zədəsiz olsun".
Qeyd edək ki, kubokun cavab görüşləri bu gün keçiriləcək. "Qarabağ" - "Araz-Naxçıvan" matçı saat 17:00-da, "Sabah" - "Neftçi" oyunu isə 20:00-da başlayacaq.
