Idman.biz
"Turan Tovuz"un sabiq baş məşqçisi Naci Şensoy keçmiş komandasının indiki durumu ilə bağlı fikirlərini bölüşüb.
İdman.biz xəbər verir ki, Komanda.az-a açıqlama verən türkiyəli mütəxəssis "Turan Tovuz"u izlədiyini bildirib.
Klub rəhbərliyini təbrik edən Naci Şensoy bildirib ki, onlar "Turan Tovuz"un yenidən Azərbaycan futbolunda söz sahibi olmasına imkan yaratdılar: "Rəhbərliyin nə qədər böyük vizyona sahib olduğu Kurban Berdıyev kimi məşqçini komandaya gətirmələrindən də açıq-aşkar görünür.
Bəli, ötən il avrokuboklara qatılmağı son anda bacarmadılar, amma bu o demək deyil ki, bu il də bunu edə bilməyəcəklər. Aydındır ki, "Turan Tovuz" rəhbərliyi uzunmüddətli perspektivdə bu məşqçi ilə işləməyi düşünür. Bu da çox düzgün yanaşmadır.
Amma başqa bir həqiqət də var ki, o da "Turan Tovuz" azarkeşləridir. Onlar baş verən hadisələrə daha emosional və səbirsiz yanaşa bilərlər! "Turan Tovuz" bu mövsüm də azarkeşlərinin gözləntilərini doğrulda bilməsə, həm rəhbərlik, həm də baş məşqçi çətin vəziyyətdə qala bilər.
Mən şəxsən "Turan Tovuz"un "Qarabağ"ı geridə qoyaraq, çempion olacağına çox da ümid etmirəm. Amma ən azından bu il avrokuboklara vəsiqə qazansalar, bunu uğur hesab edərəm. Bu reallaşandan sonra isə hədəfləri tədricən yüksəldib, çempionluğa da oynamaq çox daha məntiqli olar – belə düşünürəm".
Şensoy 2002-2003 və 2004-2005-ci illərdə Tovuz təmsilçisinin baş məşqçisi olub.
İdman.biz
